Лінкі ўнівэрсальнага доступу

Генэральная пракуратура завяла 4 200 крымінальных справаў, зьвязаных з экстрэмізмам і тэрарызмам


Генэральны пракурор Беларусі Андрэй Швед
Генэральны пракурор Беларусі Андрэй Швед

Генеральны пракурор Беларусі Андрэй Швед даў справаздачу Аляксандру Лукашэнку аб палітычна матываваных крымінальных справах.

«На сёньняшні дзень пачата больш за 4200 крымінальных справаў, зьвязаных з антыграмадзкімі праявамі. У суды ўжо накіраваныя 803 крымінальныя справы ў дачыненьні да 1116 чалавек, разгледжаны 704 крымінальных справы ў дачыненьні да 955 асобаў», — цытуе пракурора БелТА.

Андрэй Швед заявіў, што пракуроры займаюць прынцыповую пазыцыю: з улікам абставінаў сытуацыі вінаватыя прыцягваюцца да максымальнай крымінальнай адказнасьці.

Генэральны пракурор расказаў Лукашэнку пра расьсьледаваньне спробы «дзяржаўнага перавароту» у 2020 годзе. Зь яго словаў, у распараджэньні пракуратуры «бясспрэчная доказная база» ў гэтых справах.

Тры месяцы знаходзіцца за кратамі палітоляг Аляксандар Фядута, якога абвінавачваюць у змове з мэтай захопу ці ўтрыманьня дзяржаўнай улады неканстытуцыйным шляхам.

12 красавіка ў Шклове сілавікі затрымалі кіраўніка партыі БНФ Рыгора Кастусёва. Увечары таго ж дня жонка паліттэхноляга Аляксандра Фядуты паведаміла пра яго зьнікненьне ў Расеі, а 13 красавіка КДБ Беларусі паведаміў, што ён затрыманы. У ноч на 14 красавіка стала вядома аб затрыманьні ў Маскве беларускага юрыста з ЗША Юрася Зянковіча.

17 красавіка дзяржаўныя СМІ Беларусі паказалі заяву Аляксандра Лукашэнкі аб тым, што заходнія спэцслужбы нібыта рыхтавалі збройны мяцеж, а таксама замах на яго і на ягоных дзяцей. Ён абвінаваціў у датычнасьці да падрыхтоўкі замаху траіх затрыманых.

Усіх іх цяпер трымаюць у СІЗА КДБ. Сьледзтва ў справе аб спробе дзяржаўнага перавароту працягнулі да кастрычніка.

Аналягічнае абвінавачаньне выстаўлена палітыку Рыгору Кастусёву і юрысту Юрасю Зянковічу (ч. 1 арт. 357 Крымінальнага кодэксу). Усім затрыманым пагражае ад 8 да 12 гадоў пазбаўленьня волі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG