Лінкі ўнівэрсальнага доступу

Арышты і ператрусы 20 ліпеня: Актывісту Вінаградаву дадалі новыя 30 сутак пасля 15 дзён арышту

абноўлена

Юрась Губарэвіч, архіўнае фота
Юрась Губарэвіч, архіўнае фота

У Беларусі працягваецца перасьлед за выказваньне грамадзянскай пазыцыі, штодзённа адбываюцца арышты людзей і ператрусы ў іхных дамах. Свабода сочыць за падзеямі.

Вінаградава ня выпусьцяць пасьля 15 дзён арышту

Як стала вядома ягонай жонцы Сьвятлане, Паўлу дадалі зьверху паводле таго ж артыкулу яшчэ 30 сутак. Таксама праводзіцца праверка на наяўнасьць прыкметаў крымінальнага злачынства ў пасьце актывіста ў Facebook, за які ён быў затрыманы.

Пакаралі Паўла за пост, у якім ён скрытыкаваў ідэю выходзіць на пратэст 9 траўня. Аднак суд палічыў гэта, наадварот, «заклікам да ўдзелу».

5 ліпеня ў доме Вінаградавых у Бярэзані прайшоў «агляд», пасьля якога Паўла забралі ў мясцовы ізалятар часовага ўтрыманьня. Праз два дні выязны суд пакараў затрыманага паводле артыкулу 24.23 КаАП — за «несанкцыянаваную акцыю».

Сьвятлану Вінаградаву 21 ліпеня выклікаюць у Дэпартамэнт фінансавых расьсьледаваньняў Барысава як сьведку ў справе ініцыятывы ByHelp.

КДБ затрымаў сям'ю гісторыкаў Мастыкаў

Сілавікі затрымалі гісторыка і навукоўца Андруся Мастыку і ягоную жонку Тацяну Мастыку, якая ў мінулым узначальвала грамадзкае аб’яднаньне «Гісторыка».

Учора да іх зь ператрусам прыйшлі супрацоўнікі КДБ. Што шукалі і ў якой справе, невядома. На вобшук у кватэру адваката не пусьцілі. Паводле апошняй інфармацыі, Тацяна цяпер у цэнтральным апараце КДБ, яе статус невядомы. Месцазнаходжаньне Андруся пакуль невядомае, паведамляе тэлеграм-канал By_Culture.

Ператрус у сядзібе ўнівэрсытэту імя Гілевіча

У менскай сядзібе ўнівэрсытэту імя Ніла Гілевіча адбыўся ператрус, паведаміў на сваёй старонцы старшыня Таварыства беларускай мовы Алег Трусаў. «Забралі некаторыя кнігі зь бібліятэкі. Памяшканьне апячаталі», — напісаў ён.

Першы беларускамоўны ўнівэрсытэт атрымаў рэгістрацыю ў 2018 годзе і месьціцца ў Партызанскім раёне сталіцы на вуліцы Шчарбакова, 32.

Ператрус у былой кватэры Губарэвіча

Па месцы прапіскі старшыні руху «За свабоду» Юрася Губарэвіча прайшоў ператрус, ягоную былую жонку Стасю павезьлі ў невядомым кірунку.

«Раніцай быў ператрус па адрасе, дзе я прапісаны. Пяцёра невядомых кудысьці павезьлі з сабой Стасю Губарэвіч», — напісаў палітык на сваёй старонцы ў Facebook, там жа прыкладзена відэа з камэр відэаназіраньня, як людзі ў цывільным выводзяць з будынку жанчыну.

Як расказаў пазьней Юрась Губарэвіч агенцтву БелаПАН, пры вобшуку прысутнічала адна зь яго дачок. З сабой невядомыя забралі скрынку з рэчамі. Сам палітык у гэты момант на волі. Пазьней стала вядома, што Стасю Губарэвіч адпусцілі, але аштрафавалі на 70 базавых велічыняў за бел-чырвона-белы сьцяг, знойдзены падчас ператрусу. Супрацоўнікі ГУБАЗіК таксама забралі тэхніку, а заўтра прыйдуць апісваць маёмасць.

Сілавікі ўжо прыходзілі па месцы прапіскі Юрася Губарэвіча 14 ліпеня. Аднак у той раз зьехалі да таго, як прыехала дадому дачка.

21 траўня Міністэрства юстыцыі вынесла пісьмовае папярэджаньне руху «За свабоду». Падставай паслужыла нібыта парушэньне заканадаўства «ў частцы непадачы дакумэнтаў аб наяўнасьці ў грамадзкага аб’яднаньня юрыдычнага адрасу».

25 чэрвеня кіраўніцтва руху атрымала зь ведамства прадпісаньне да 13 ліпеня падаць шэраг дакумэнтаў у сувязі з правядзеньнем «кантрольных мерапрыемстваў па вывучэньні дзейнасьці грамадзкага аб’яднаньня на прадмет адпаведнасьці патрабаваньням заканадаўства».

14 ліпеня ў офіс арганізацыі прыйшлі зь ператрусам, пасьля чаго памяшканьне было апячатана. У той жа дзень ператрус прайшоў дома ў намесьніка старшыні арганізацыі Віктара Янчурэвіча.

Затрыманьне музыкі Максіма Субача

У Менску затрымалі музыку, удзельніка гуртоў TonqiXod і Subtonans Максіма Субача, піша By_Culture.

Галоўнага рэдактара горадзенскага выданьня Hrodna.life Аляксея Шоту выклікалі на 17.00 у Ленінскі РАУС у пытаньні тэхнікі, якую забралі з рэдакцыі падчас агляду ў студзені. Неўзабаве пасьля паходу ў РАУС Шота паведаміў, што яго выклікалі ў пракуратуру. Па якім пытаньні, рэдакцыі невядома.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG