«Тут акрамя года незаконнага зьняволеньня і закрытага „суду“ вырашылі дабіць яшчэ зьнявагай чалавечай годнасьці. Па-першае, бясконцыя разьдзяваньні, прысяданьні ў голым выглядзе, суправаджэньне ў кайданках у позе „ластаўка“, як быццам я нейкі асабліва небясьпечны злачынец.
Раз ці два на тыдзень у камэры пастаянныя ператрусы з трыбушэньнем усіх рэчаў. Незразумела, што хочуць знайсьці — думаюць, я нешта з сабой зраблю (гэта пасьля выпадку як Латыпаў сабе горла парэзаў на судзе). Я, вядома, нічога такога не зьбіраўся рабіць, але шчыра скажу, такія дзеяньні вельмі зьневажальныя і моцна бʼюць па чалавечай годнасьці, і таму гэтым самадурствам яны могуць прывесьці да адваротнага эфэкту.
З гэтымі сталымі ператрусамі і разьдзяваньнем адчуваю сябе як вязень у Асьвеньціме, толькі што залатых каронак ня выдзіраюць», — напісаў Ігар Лосік жонцы Дарʼі ў лісьце 4 ліпеня.
- Працэс у справе Ігара Лосіка, Сяргея Ціханоўскага, Міколы Статкевіча, Уладзімера Цыгановіча, Дзьмітрыя Папова, Арцёма Сакава пачаўся ў Гомлі 24 чэрвеня. Ён праходзіць у закрытым рэжыме ў памяшканьні СІЗА-3.
- Усе шасьцёра былі затрыманыя ў траўні-чэрвені 2020 году і абвінавачаныя па шэрагу крымінальных артыкулаў, такіх як «масавыя беспарадкі», «перашкода працы ЦВК», «распальваньне сацыяльнай варожасьці».
- Распачаты працэс – самы значны ў так званай «справе Ціханоўскага», адной з найбольш маштабных крымінальных справаў у 2020-2021 гадах у РБ. Большасьць яе фігурантаў (паводле дадзеных праваабаронцаў – каля 30 чалавек) ужо асуджаныя.
- Палітвязень Сьцяпан Латыпаў, пра якога піша ў лісьце Ігар Лосік, 1 чэрвеня падчас паседжаньня суду ў Менску спрабаваў забіць сябе – уторкнуў асадку сабе ў горла. Пасьля здарэньня Латыпава праапэравалі ў адным зь менскіх шпіталяў, а потым зноў перавялі ў СІЗА.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
