Як гаворыцца на сайце мытнай службы Літвы, аўтамабіль DAF прыбыў на аўтамабільны пост «Райгардас» зь Беларусі, кіроўца паведаміў супрацоўнікам, што едзе ў Нямеччыну з грузам вырабаў з драўніны.
Кантралёры адправілі грузавік на праверку. Разабраўшы адзін з пакункаў, мытнікі знайшлі замаскаваныя скрынкі з кантрабанднымі цыгарэтамі. Агулам — больш за 400 тысяч пачкаў гатунку «Minsk Superslims».
Ковенскае аддзяленьне мытнай крымінальнай службы пачало дасудовае расьсьледаваньне. Кіроўца затрыманы.
Раней літоўскія мытнікі знаходзілі цыгарэты ў вагонах з угнаеньнямі прадпрыемстваў «Беларуськалій» і «Гродна Азот», цыгарэтныя блёкі нават залівалі бэтонам.
Найбольшую партыю кантрабандных цыгарэт беларускай вытворчасьці сёлета на пачатку траўня затрымалі польскія памежнікі — на суму блізу 10 мільёнаў даляраў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў