Арганізатары прэміі плянуюць узнагародзіць асобы і арганізацыі, якія праявілі сябе найбольш у змаганьні за дэмакратыю.
«Кожны з нас не самотны ў сваім змаганьні зь несправядлівасьцю і сярэднявеччам у эўрапейскай краіне XXI стагодзьдзя.
Ствараючы гэту прэмію, мы ставілі сабе за мэту адрэфлексаваць мінулы, абсалютна выключны для нашага грамадзтва год. Гэта ўзнагарода магла б дастацца кожнаму, хто адкрыў у сабе ашаламляльную ўнутраную сілу для барацьбы з цемрай і хамствам.
Мы захапляемся кожным з іх, але з упэўненасьцю можна сказаць, што ўсё гэта было б немагчыма без людзей, якія не пабаяліся першымі кінуць выклік беззаконьню і паказаць, што кожны з нас не самотны ў сваім змаганьні з несправядлівасьцю і сярэднявеччам у эўрапейскай краіне XXI стагодзьдзя.
Бесчалавечная машына хлусьні, створаная рукамі Лукашэнка, спрабавала закаваць усё жывое ў вечныя ільды, але кожнае ваша «не» дадае ў іх расколіны і набліжае дзень, калі свабодны дух беларускай рэвалюцыі скіне з сябе лёд рэпрэсіяў, — гаворыцца ў прадмове галасаваньня.
Усяго прадстаўленыя 10 намінацый. Сярод іх — узнагароды замежных палітычным дзеячам, СМІ, блогам, валянтэрам, палітычным аналітыкам, пратэстоўцам, рэлігійным герархам.
У намінацыі «Бязь межаў» на перамогу прэтэндуе і беларуская служба Радыё Свабода, таксама намінаваныя тэлеканал «Белсат», Outriders Unblocked, «Медиазона», «Дождь», «Настоящее Время» і Deutsche Welle.
Галасаваньне пачалося 6 лютага 2021 году. Уручэньне ўзнагарод чакаецца 27 сакавіка 2021 году.