У судовых спрэчках выступіў пракурор Андрэй Аношка. Ён заявіў, што абвінавачаны «ня здольны да самакантролю сваіх паводзінаў», «выбраў няправільныя жыцьцёвыя арыенціры», «мае павярхоўнае ўяўленьне і пра нашу гісторыю, і пра нашых герояў, пра якіх ведала мінулае пакаленьне — такіх, як Марат Казей і Бацька Мінай».
Пракурор у сваім выступе таксама зазначыў, што пры падзеях 10-11 жніўня падлетак быў у масцы. «Чэсны чалавек ня будзе надзяваць маску. Маску надзяваюць, калі хочуць схаваць твар. Гэты момант кажа, што абвінавачаны добра разумеў, што твар на ўсялякі выпадак трэба схаваць», — выказаўся Андрэй Аношка.
Таму пракурор запатрабаваў, гаворачы аб пакараньні: «Трэба вызначыцца наконт умоваў, у якіх абвінавачаны будзе пад кантролем, будзе працягваць самаўдасканальвацца, атрымае станоўчыя навыкі ў жыцьці».
Паводле абвінавачаньня, Віталь, «выконваючы заклікі ў інтэрнэце», прыняў удзел у масавых беспарадках, каб «незаконнымі спосабамі выказаць свае погляды і з мэтай дэструктыўнай дзейнасьці». Людзі нібыта выгуквалі лёзунгі, адмаўляліся выконваць загады міліцыі, заклікалі міліцыю адмовіцца выконваць свае паўнамоцтвы, кідалі камяні, бутэлькі. Гэта ўсё адбывалася таму, што ўдзельнікі мітынгу «адчувалі азлобленасьць у дачыненьні да супрацоўнікаў органаў унутраных спраў».
Непаўналетні не прызнае віны. Ён кажа, што сапраўды быў каля Палаца культуры мэталюргаў, дзе адбываўся мітынг, але не прымаў у ім удзелу. Пляцоўка каля Палаца культуры — традыцыйнае месца збору мясцовай моладзі. У той дзень Віталь таксама там сустракаўся зь сябрамі. За мітынгам ён назіраў, бо «было цікава».
Да суду ён расказаў, што міліцыя затрымала яго 11 жніўня і пры затрыманьні яго зьбілі. Маці Віталя падавала аб гэтым заяву, падлетак здымаў пабоі, але крымінальнай справы пакуль не распачалі, дагэтуль вядзецца праверка.
Гэтая публікацыя падрыхтавана з выкарыстаньнем інфармацыі БелаПАН
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў