Жонка Ігара Лосіка Дар’я расказала Свабодзе, як ён выходзіць з галадоўкі.
«Ігар адчувае сябе нармальна, нейкіх асаблівых навінаў няма, — кажа Дар’я. — Сказаў, што ў яго больш за 200 лістоў было, на якія яшчэ не адказаў. І яшчэ каля 160 на гэтым тыдні прынесьлі. Я пыталася ў лекара, чаму майго мужа не агледзелі пасьля спыненьня галадоўкі. Мне на гэта сказалі, што я паставіла іх у тупік. Маўляў, ён ня скардзіцца ні на што, яго і не аглядаюць. Яны ня ведаюць, трэба яму мэдычны агляд ці не».
Па словах Дар’і, мэдыкі перасталі прыходзіць да Ігара адразу пасьля таго, як ён спыніў галадоўку. Цяпер ён нават ня ведае, які ў яго ціск (пасьля 30 дзён галадоўкі ў палітвязьня пачаліся зь ім праблемы. — РС). Раней ціск вымяралі двойчы на дзень.
«Я прывозіла вітаміны Ігару, — кажа Дар’я. — Вітамін А і вітамін Е. Усё прынялі без пытаньняў, з гэтым няма праблемаў».
Пра завяршэньне сьледзтва па справе Ігара Лосіка, а таксама пра дату пачатку суду па-ранейшаму нічога не вядома.
Палітвязень Ігар Лосік, блогер і кансультант Радыё Свабода, за кратамі з 25 чэрвеня 2020 году. У канцы студзеня ён выйшаў з галадоўкі, якую трымаў з 15 сьнежня на знак пратэсту супраць новых абвінавачаньняў.
У сьледчай турме ў Жодзіне Ігара двойчы на тыдзень наведвае адвакат, перадачы яму прывозіць жонка Дар’я.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
