Дрэваапрацоўка
У 2007 годзе з падачы Аляксандра Лукашэнкі пачалася падтрымка прадпрыемстваў, якія займаюцца дрэваапрацоўкай. Дзевяці зь іх выдзелілі крэдыты агульнай сумай больш як на 1 мільярд даляраў.
Цяпер гэтыя прадпрыемствы аб’яднаныя ў холдынг, але большасьць зь іх стратнымі ад гэтага быць не перастаюць. «Барысаўдрэў», напрыклад, паводле парталу адзінага фінансавага рынку (portal.gov.by), скончыў 2019 год са стратамі ў 4,5 мільёна рублёў, мае 270 мільёнаў даўгоў.
«Віцебскдрэў» завяршыў 2018 год са стратамі на 16 мільёнаў рублёў. Сьвяжэйшай справаздачнасьці яны не публікавалі, затое некалькі разоў атрымлівалі адтэрміноўку плацяжоў па даўгах і крэдытах. Толькі тры зь дзевяці заводаў за 2019 год паказалі невялікі прыбытак: ад 4 да 12 мільёнаў. Пры гэтым даўгі перавышаюць гэтыя прыбыткі, часам у сотню разоў. Напрыклад, прыбытак «Гомельдрэва» за 2019 год — 4,7 мільёна, а даўгі — больш як мільярд.
Усімі прадпрыемствамі холдынгу дрэваапрацоўкі займаецца Банк рэканструкцыі і разьвіцьця.
Вытворчасьць цэмэнту
Каля 1 мільярда даляраў дзяржава патраціла на мадэрнізацыю цэмэнтных заводаў. Гэта Беларускі цэмэнтны завод у Касьцюковічах, «Крычаўцэмэнташыфэр» і «Краснасельскбудматэрыялы». Усе тры заводы па выніках 2019 году стратныя:
«Краснасельскбудматэрыялы» — мінус 27 мільёнаў рублёў «Крычаўцэмэнташыфэр» — мінус 17,3 мільёна рублёў Беларускі цэмэнтны завод — мінус 8,9 мільёна рублёў
Усе гэтыя заводы, як і ў выпадку з дрэваапрацоўкай, аб’яднаныя ў Беларускую цэмэнтную кампанію.
Падтрымка сельскай гаспадаркі
У верасьні 2020 году выйшаў указ Лукашэнкі «Аб падтрымцы аграпрамысловага комплексу Віцебскай вобласьці». Паводле яго, арганізацыі вобласьці атрымалі каля 480 мільёнаў рублёў. Прадпрыемствы аб’ядналі ў холдынг «Мяса-малочныя прадукты».
У холдынг увайшлі больш за дзясятак прадпрыемстваў, сярод якіх віцебскае ААТ «Малако». У 2019 годзе гэтае прадпрыемства мела стратаў на 23,3 мільёна рублёў і 139,9 мільёна даўгоў (кароткатэрміновых і доўгатэрміновых).
У 2019 годзе 17,3% арганізацый сельскай гаспадаркі Віцебскай вобласьці былі стратныя, рэнтабэльнасьць продажаў прадукцыі — мінус 0,3%. Па крэдытах усе сельскагаспадарчыя арганізацыі Віцебскай вобласьці вінныя былі 1,5 мільярда рублёў.
Трэба адзначыць, што па ўказу № 143 «Аб падтрымцы эканомікі», які выйшаў у красавіку і быў скіраваны на падтрымку арганізацый у часы пандэміі, малочныя прадпрыемствы Віцебскай вобласьці атрымалі яшчэ каля 11 мільёнаў рублёў.
