Праваабаронцы прааналізавалі судовыя выракі 9350 чалавек. Што кажуць лічбы аб працы беларускіх судоў?
Адміністрацыйны перасьлед
Праваабаронцы прааналізавалі дадзеныя па 9350 судовых справах са жніўня па студзень. З гэтага ліку 4,5 тысячы чалавек у беларускіх судах атрымалі суткі, агулам гэта 58 517 сутак, або 160 гадоў зьняволеньня.
Штрафы атрымалі 3,2 тысячы чалавек, на ўсіх гэта 58 тысяч базавых велічыняў, або 1,5 мільёна ў беларускіх рублях.
Сярод асуджаных па адміністрацыйных артыкулах 77% — мужчыны і 19,4% — жанчыны.
92% затрыманых асуджаныя па артыкуле 23.34 (парушэньне парадку арганізацыі ці правядзеньня масавых сходаў). 7% асуджаныя па артыкуле 23.4 — непадпарадкаваньне распараджэньню службовай асобы.
Найбольш судоў праваабаронцы зафіксавалі ў Менску (6350), Жодзіне (1428), Магілёве (352).
Адзін з рэкардсмэнаў — судзьдзя Першамайскага суда Менску Максім Трусевіч. За палітычную кампанію 2020 году ён прысудзіў людзям 5,5 года па адміністрацыйных справах і наштрафаваў на 37 тысяч рублёў. За адзін дзень ён мог выносіць па 27 прысудаў.
Найбольш сутак прысудзілі студэнту 4-га курсу БДУІР Яну Салановічу. Па стане на 15 сьнежня мінулага году агулам яму прысудзілі 115 сутак. Хлопца затрымалі 1 лістапада падчас мірнага шэсьця.
Крымінальны перасьлед
Ад пачатку выбарчай кампаніі праваабаронцам вядома больш як пра 1000 крымінальных спраў. У 2020 годзе суды Беларусі пасьпелі вынесьці рашэньні па 103 крымінальных справах. Самыя распаўсюджаныя сярод іх — крымінальны артыкул 364 (гвалт або пагроза гвалту ў дачыненьні да супрацоўніка органаў унутраных спраў). А таксама 363 артыкул (супраціў супрацоўніку органаў унутраных спраў) і 342 артыкул (арганізацыя ці актыўны ўдзел у дзеяньнях, якія парушаюць грамадзкі парадак).
Самае жорсткае пакараньне, якое вынес суд у мінулым годзе, — гэта 7 гадоў калёніі ўзмоцненага рэжыму для Ўладзімера Гароха. Гэтая справа за беспарадкі, якія нібыта рыхтаваліся ў Наваградку і іншых раёнах Гарадзенскай вобласьці. Уладзімер Гарох прызнаны палітвязьнем.
У іншых выпадках людзей каралі пазбаўленьнем волі на тэрмін ад 1 да 5 гадоў. Найбольш прысудаў было ў Менску (40), Гарадзенскай і Гомельскай абласьцях (па 13).
