У сувязі з інфармацыяй аб узяцьці пад варту і прад’яўленьні абвінавачаньняў па частцы 2 артыкула 293 Крымінальнага кодэксу (масавыя беспарадкі) праваабарончая супольнасьць прызнала траіх чалавек палітвязьнямі. Гэта Сьвятаслаў Герасімук, Ян Фалькін і Аляксей Мельнікаў.
Яшчэ шасьцёра сталі палітычнымі зьняволенымі пасьля абвінавачаньняў па частцы 1 артыкула 342 Крымінальнага кодэксу (групавыя дзеяньні, якія груба парушаюць грамадзкі парадак): Вольга Паўлава, Аляксандар Раентаў, Вікторыя Міронцава, Анастасія Міронцава, Мікалай Шаметаў і грамадзянін Расеі Аляксандар Геджадзэ.
Праваабаронцы адзначылі, што ўлады адносна гэтых грамадзянаў парушылі іх канстытуцыйную свабоду ўдзельнічаць у мірных сходах, тады як самі выступы насілі стыхійны, самаарганізаваны характар, іх выклікаў недавер да вынікаў выбараў прэзыдэнта 9 жніўня.
Перасьлед усіх пералічаных 9 грамадзянаў падпісанты заявы назвалі палітычна матываваным.
Праваабаронцы патрабуюць спыніць перасьлед усіх палітычных вязьняў і выпусьціць іх зь месцаў пазбаўленьня волі. Паводле стану на 11 студзеня ў Беларусі 176 палітвязьняў, іх колькасьць пастаянна расьце.
