Твітэр разблякаваў акаўнт прэзыдэнта пасьля таго, як ён выдаліў некалькі ўчорашніх твітаў, якія ўтрымлівалі нічым не абгрунтаваныя сьцьвярджэньні аб «крадзяжы галасоў» падчас прэзыдэнцкіх выбараў.
У відэазвароце, апублікаваным на старонках Трампа ў Твітэры і Ютубе, прэзыдэнт заявіў, што ў дадзены момант ён засяроджаны на «плаўным і ўпарадкаваным працэсе перадачы ўлады» новай адміністрацыі.
«Цяпер Кангрэс пацьвердзіў вынікі галасаваньня. 20 студзеня адбудзецца інаўгурацыя новай адміністрацыі. Зараз я засяроджаны на забесьпячэньні плаўнай і ўпарадкаванай перадачы ўладных паўнамоцтваў. У гэты момант нам патрабуецца вылячэньне і прымірэньне», — заявіў прэзыдэнт, зьвяртаючыся да амэрыканцаў.
Трамп заявіў, што ён быў абураны «жахлівым нападам» на Капітолій, сказаўшы, што дэманстранты, людзі, якія ўварваліся ў сераду днём у будынак Кангрэсу, «апаганілі цэнтар амэрыканскай дэмакратыі».
Па словах прэзыдэнта, людзі, якія парушылі закон і ўчынілі гвалтоўныя дзеяньні «не прадстаўляюць нашу краіну і панясуць адказнасьць». Трамп дадаў, што чатыры гады, праведзеныя ім на пасадзе прэзыдэнта, сталі самым вялікім гонарам у яго жыцьці.
