Пра вырак паведаміла ініцыятыва «Сьпісы затрыманых».
Мужчыну судзілі па двух артыкулах Адміністрацыйнага кодэксу — 23.34 (удзел у несанкцыянаваным масавым мерапрыемстве) і 23.4 (непадпарадкаваньне законнаму распараджэньню ці патрабаваньню супрацоўніка праваахоўных органаў пры выкананьні ім службовых абавязкаў).
Паўла затрымалі 1 студзеня. Па словах Ніны Багінскай, у гэты дзень яна выйшла на скрыжаваньне вуліц Коласа і Чарнышэўскага ў Менску, а сын яе суправаджаў, каб маці не была адна. Пасьля акцыі яны пайшлі дадому па вуліцы Ўсходняй, і Паўла затрымалі. Іншых людзей навокал не было.
Перадачу Багінскай для сына (паперу, зубную шчотку, мандарыны) не прынялі. З гэтай нагоды яна напісала заяву ў міліцыю.
Суд пачаўся 4 студзеня, але судзьдзя Фёдарава накіравала справу на дапрацоўку. На наступны дзень Павал Багінскі быў асуджаны на 12 сутак за ўдзел у несанкцыянаваным масавым мерапрыемстве. Другі пратакол (непадпарадкаваньне супрацоўніку праваахоўных органаў) накіравалі на дапрацоўку.
Што трэба ведаць пра Ніну Багінскую
«Чалавек-сьцяг» — 75-гадовая пэнсіянэрка Ніна Багінская стала адным з сымбаляў беларускіх пратэстаў ня толькі 2020 году, але і ўсяго дзесяцігодзьдзя.
- Да беларускага нацыянальна-дэмакратычнага руху яна далучылася яшчэ ў 1988 годзе, калі на Дзяды выйшла на марш у Курапаты.
- Расла ў сям’і гарадзкой інтэлігенцыі, бацькі мелі беларускамоўных сяброў, расказвалі пра рэпрэсіі 1930-х.
- Працавала чарцёжніцай у Інстытуце геалёгіі, займалася веласпортам.
- Багінская — нязьменная ўдзельніца шматлікіх акцый пратэсту цягам многіх гадоў. Яе дзясяткі разоў затрымлівалі, яна ня раз начавала ў ізалятарах.
- Яна адна з рэкардсмэнаў па колькасьці штрафаў — больш за 16 тысяч даляраў, якія яна прынцыпова адмаўляецца плаціць. За гэта ў яе апісалі два лецішчы і штомесяц забіраюць палову пэнсіі.
- Ня мае мабільнага тэлефона, не карыстаецца інтэрнэтам, не глядзіць тэлевізар з прычыны кепскага зроку. Затое выпісвае незалежныя газэты.
- Усе сьцягі, зь якімі выходзіць на пратэсты, шые сама. Пашыла ўжо сотні сьцягоў. Многія зь іх міліцыя пазабірала пры затрыманьнях.
- Лічыць, што трэба перамагаць негвалтоўна, бяз зброі ў руках. Увесь час намагаецца размаўляць зь сілавікамі, прысаромліваць іх і тлумачыць, у чым яны ня маюць рацыі.
- Словы актывісткі амапаўцу «Я гуляю» сталі лёзунгам мірных пратэстаў і інтэрнэт-мэмам.
- Сама Багінская стала мастацкім вобразам і крыніцай натхненьня для мастакоў, якія адлюстроўваюць сучасныя падзеі ў Беларусі.
- У верасьні 2020 году фатаздымкі актывісткі апублікаваў вядомы італьянскі часопіс пра моду Vogue.
- Паводле актывісткі, сымбалем пратэстаў яе зрабілі журналісты і самі пратэстоўцы, найперш моладзь.
- У кастрычніку, камэнтуючы пратэсты, Аляксандар Лукашэнка загадаў «не забіраць Багінскую з плошчаў», назваў яе перакананым чалавекам. Пасьля гэтага актывістку некалькі разоў затрымлівалі, але адпускалі без пратаколаў.
- Мае двух дзяцей, унукаў і праўнукаў.
