Адключэньне Беларусі ад SWIFT — зброя Суднага дня

На гэтыя тэмы ў Праскім акцэнце спрачаюцца і разважаюць Анатоль Котаў, былы дыплямат, адказны ў Народным антыкрызісным кіраўніцтве (НАК) за замежную палітыку і гандаль, і палітоляг Аляксандар Уласкін.

Котаў

• Народнае антыкрызіснае кіраўніцтва (НАК) падтрымала апытаньне на плятформе «Голос» аб мэтазгоднасьці адключэньня Беларусі ад SWIFT.
• У НАК няма ілюзіяў наконт гэтай меры, ня мы выступалі ініцыятарамі адключэньня Беларусі ад SWIFT.
• Гэта вельмі складаная працэдура, выключэньне банкаў Беларусі са SWIFT зойме ў самым лепшым выпадку некалькі месяцаў.
• Большасьць беларускіх банкаў ужо падключаная да расейскага аналягу гэтай міжбанкаўскай сыстэмы — СПФС.
• Ёсьць прэцэдэнты такіх адключэньняў — гэта асобныя банкі Ірану і ўся банкаўская сыстэма КНДР.
• Ідзе «забіваньне» беларускай гаспадаркі праз дзейны рэжым. Яна можа абрынуцца раней, чым мы дачакаемся адключэньня SWIFT.
• Паводле ацэнак эканамічнага дарадніка Ціханоўскай Алеся Аляхновіча, у беларускай эканомікі ёсьць рэсурсаў ня больш на 4-6 месяцаў, калі ня будзе вонкавага сілкаваньня.
• У кастрычніку ніхто ня верыў, што Міжнародны алімпійскі камітэт можа ўвесьці санкцыі супраць Нацыянальнага алімпійскага камітэту, гаварылася, што гэта складаная працэдура і прэцэдэнтаў не было.
• Але ўчора рашэньне было прынятае.
• Многія кпілі з маруднай працэдуры прыняцьця санкцыяў у ЭЗ. Але ізноў жа ўчора быў прыняты эўрапейскі аналяг «акту Магніцкага».
• Я б раіў ставіцца да адключэньня Беларусі ад SWIFT як да зброі Суднага дня, якую лепш не чапаць. Але беларускія ўлады мусяць ведаць, што яна ёсьць.
• У межах эўрапейскага «акту Магніцкага» могуць быць уведзеныя санкцыі на экспарт беларускіх калійных угнаеньняў.

Уласкін

• Многія прадстаўнікі бізнэс-супольнасьці Беларусі казалі, што адключэньне Беларусі ад SWIFT, нават калі яго рэалізаваць, — гэта будзе страляніна з гарматаў па вераб’ях.
• Адключэньне пэўных іранскіх банкаў ад SWIFT не прывяло да зьменаў ва ўнутранай і замежнай палітыцы Тэгерану.
• Пры адключэньні SWIFT узьнікнуць праблемы з крытычным імпартам, прынамсі тых лекаў, якія не прадукуюцца ў Беларусі, хімікатаў, патрэбных для ачысткі вады.
• Ці гатовыя мы да таго, што ў выніку адключэньня SWIFT мы пазбавімся доступу да чыстай пітной вады?
• Улады заявяць, што ва ўсіх праблемах вінаватыя тыя, хто адключыў SWIFT.
• Я мяркую, што магчымасьць адключэньня SWIFT выкарыстоўваецца цяпер як інструмэнт інфармацыйнага, а не эканамічнага ціску.
• Расейская сыстэма СПФС стваралася на піку размоваў пра тое, што Расею могуць адключыць ад SWIFT.
• У выпадку адключэньня Беларусі ад SWIFT можа скласьціся такая самая сытуацыя, як у Крыме, наша банкаўская сыстэма стане філіялам расейскай.
• Шмат малых і сярэдніх бізнэсаў пры адключэньні Беларусі ад SWIFT могуць проста не дажыць да зьмены палітыкі.
• На «Голосе» галасавалі пераважна тыя, хто супраць улады. Але нават сярод іх траціна — супраць адключэньня SWIFT. У больш шырокай выбарцы праціўнікаў гэтага кроку было б яшчэ больш.