Разам з тым пазыцыя МАК ацэньваецца «як перадузятая, заснаваная на ангажаванасьці і павярхоўным вывучэньні сытуацыі ў краіне». Беларускі бок выказаў заклапочанасьць, што ў асобных пунктах рашэньне «магло зазнаць палітычны ціск».
«Мы лічым, што спорт павінен быць па-за палітыкай. Аднак часовыя меры ў дачыненьні практычна да ўсіх чальцоў выканкаму НАК Беларусі (выключэньне — „парусьніца“ Тацяна Драздоўская. — РС), а таксама прыпыненьне фінансаваньня шэрагу сумесных праграмаў лічым не адпаведным асноватворным прынцыпам і каштоўнасьцям алімпізму. Мы разглядаем гэта як палітычна матываваны крок, накіраваны на аказаньне ціску на кіраўніцтва беларускага НАК».
У адказе гаворыцца, што пазыцыя МАК «не адпавядае аб’ектыўнай ацэнцы намаганьняў НАК Беларусі ў выкананьні палажэньняў Алімпійскай хартыі, міжнароднага і беларускага спартовага заканадаўства».
«У нашай краіне створаны ўсе ўмовы для спартоўцаў, якія вядуць плянавую падрыхтоўку да галоўных стартаў чатырохгодзьдзя і будуць выступаць пад дзяржаўным сьцягам на маючых адбыцца Гульнях. Мы заўсёды адкрытыя да дыялёгу і гатовыя змагацца супраць любых формаў дыскрымінацыі, якія наносяць шкоду алімпійскага руху. У сваю чаргу заклікаем кіраўніцтва МАК аб’ектыўна разглядаць стан спраў у беларускім спорце».
НАК Беларусі заявіў, што пакідае за сабой права «адстойваць пазыцыю ў адпаведнасьці з Алімпійскай хартыяй і міжнародным спартовым правам».
Раней нязьменны прэзыдэнт арганізацыі ад 1997 году Аляксандар Лукашэнка прыгразіў, што падасьць у суд «на Баха і ягоную банду» — відавочна, маючы на ўвазе прэзыдэнта МАК Томаса Баха.
