Зьмененая мера стрыманьня чатыром зь пяці фігурантаў справы «Белцяжмашу». Яны выйшлі на волю пад падпіскі аб нявыезьдзе. Пад вартай застаўся кіраўнік дэвэлапэрскай кампаніі Ігар Анішчанка.
Пра гэта паведамляе партал Tut.by са спасылкай на інфармаваную крыніцу.
16 верасьня прадстаўнікі праваахоўных органаў прыйшлі ў офісы групы кампаній «Белцяжмаш», якімі кіруюць бізнэсоўцы Ігар, Аляксандар і Дзьмітры Анішчанкі. Увечары таго ж дня зьявілася інфармацыя, што ўладальнікаў і двух топ-мэнэджараў групы кампаній «Белцяжмаш» затрымалі.
Дэпартамэнт фінансавых расьсьледаваньняў КДК падазрае кіраўніцтва «Белцяжмашу» ва ўхіленьні ад выплаты падаткаў на суму больш як 6 млн рублёў.
Затрыманьне кіраўнікоў «Белцяжмашу» адбылося праз тыдзень пасьля таго, як спэцслужбы апячаталі памяшканьне штабу Віктара Бабарыкі. Каманда былога кіраўніка Белгазпрамбанку, які ў траўні абвясьціў пра свае прэзыдэнцкія амбіцыі, наймала офіс у будынку па вул. В. Харужай, 25/1, які здае ў арэнду «Белцяжмаш». Пазьней там разьмяшчалася і Каардынацыйная рада па транзыце ўлады.
