26 жніўня ў Менску і іншых гарадах Беларусі працягнуліся затрыманьні ўдзельнікаў мірных акцый і суды над затрыманымі раней, інфармуе Праваабарончы цэнтар «Вясна».
Менск
Увечары 26 жніўня АМАП разагнаў удзельнікаў акцыі пратэсту на плошчы Незалежнасьці, частку зь іх затрымалі. Сьпіс затрыманых:
- Антон Уласенка;
- Антон Шыбанаў;
- Аляксандар Байбак;
- Аляксей Супранюк;
- Антон Шаўлікаў;
- Андрэй Емяльянаў;
- Павал Каваленка;
- Арцём Лысакоўскі;
- Дзяніс Сачышын;
- Глеб Рэут;
- Ігнат Кірэеў;
- Арцём Падрэз;
- Андрэй Клінцоў;
- Сяргей Шчыценка;
- Ігар Хадаровіч;
- Раман Мікалаеў,
- Андрэй Красьнікаў;
- Аляксандар Балоцін;
- Арцём Лява, журналіст «Белсату», увечары здымаў акцыю на Плошчы Незалежнасьці, тэлефон недасяжны.
Большасьць затрыманых даставілі ў РУУС Савецкага раёну Менску, частку ў РУУС Кастрычніцкага раёну.
Асуджаныя 26 жніўня:
- Аляксандар Лаўрыновіч — 10 сутак адміністрацыйнага арышту (Лаўрыновіч — старшыня страйкавага камітэту Менскага завода колавых цягачоў, асудзілі за ўдзел у мітынгу 23 жніўня і за тое, што на тэрыторыі завода зьбіраў подпісы за страйк, што клясыфікавалі як «незаконны сход»),
- Георгі Пяшчанскі — 7 сутак арышту, (Іераманах мужчынскага Спаса-Праабражэнскага манастыра, у 17:00 25 жніўня выехаў з кляштара, у 19:00 зайшоў у фірму па продажы квіткоў, пайшоў чакаць аўтобус, які павінен прыйсьці ў 22:00. Прыйшоў да аўтобуса ў 21:50. У аўтобус заскочылі хлопцы і схапілі яго, прывезьлі ў Маскоўскі РУУС, судзіў С. Кацэр),
- Іван Цуранаў — 8 сутак арышту (затрыманы 25 жніўня каля плошчы Незалежнасьці, судзілі ў судзе Першамайскага раёну),
- Аляксей Сарычаў —10 сутак арышту (затрыманы 25 жніўня каля плошчы Незалежнасьці, судзілі ў судзе Першамайскага раёну),
- Г. Валчэцкі — 8 сутак арышту (суд Маскоўскага раёну, судзьдзя Тацяна Мотыль, за ўдзел у несанкцыянаваным мітынгу 25 жніўня),
- Ян Кожыч — 9 сутак арышту (суд Маскоўскага раёну, судзьдзя Малашэнка),
- Ягор Літвінка — 7 сутак арышту (затрыманы 24 жніўня, асудзілі 25 жніўня).
Салігорск
У Салігорску 26 жніўня супрацоўнікі міліцыі затрымалі праваабаронцу Беларускага Хэльсынскага камітэту Леаніда Мархотку. Людзі ў цывільным чакалі яго на вуліцы, схапілі, пасадзілі ў аўтамабіль і зьвезьлі ў невядомым кірунку. На яго склалі пратакол за нібыта парушэньне парадку правядзеньня мітынгу (арт. 23.34 ч. 1) прысудзілі 675 рублёў штрафу.
Баранавічы
У доме Тамары Патоцкай (давераная асоба Сьвятланы Ціханоўскай) прайшоў ператрус, паведаміў яе муж, самой Тамары Патоцкай у гэты час дома не было.
Бяроза
Бярозаўскія міліцыянты склалі пратакол адміністрацыйнага правапарушэньня па арт 23. 34 КаАП на журналістку Тамару Шчапёткіну, зрабіўшы яе арганізатарам і ўдзельніцай «Марша ў памяць закатаваных», які адбыўся ў Бярозе 23 жніўня. Пра пратакол журналістка даведалася, калі ішла па горадзе, дзе яе дагналі міліцыянты і прапанавалі падпісаць пратакол.
Ваўкавыск
У Ваўкавыску затрыманы Аляксандар Навасад. Падстава — удзел у мітынгу 25 жніўня.
Віцебск
Каля 13-ай гадзіны на праспэкце Будаўнікоў гвалтоўна затрымалі траіх дзельнікаў «ланцугу салідарнасьці» (аднаго зь іх клічуць Андрэй Дробышаў, прозьвішчы яшчэ двух невядомыя).
Горадня
У Горадні за ўдзел у «незаконным масавым мерапрыемстве» асуджаныя:
- Яўген Дудкін (сябра БХД) — штраф 135 рублёў,
- Дзьмітры Садоўскі — штраф 270 рублёў,
- Леанід Дзіскавец — штраф 270 рублёў,
- Васіль Кананчук — штраф 675 рублёў.
Добруш
Затрымалі ўдзельніка акцыі пратэсту 25 жніўня Станіслава Мазачава, даставілі ў мясцовы РАУС, верагодна для складаньня пратаколу.
Жодзіна
У другой палове дня ў Жодзіна затрымалі Дзьмітрыя і Юлію Крупу (муж і жонка).
У Жодзінскім гарадзкім судзе асудзілі ўдзельніка акцыі пратэсту Андрэя Грабко (прысуд невядомы).
Магілёў
Затрыманыя Павел Мільянцоў і Віталь Мякшынаў, якія былі незалежнымі назіральнікамі на прэзыдэнцкіх выбарах. Іх забраў участковы нібыта па скарзе жыхароў. Імаверна, Паўла і Віталя даставілі ў Ленінскі РАУС.
Масты
Каля 9-ай раніцы ранку ў кватэру Віктара Царыкевіча прыйшлі з вобшукам супрацоўнікі міліцыі, пасьля чаго яго забралі ў мясцовы РАУС.
