Упершыню ад пачатку палітычнага крызісу, на фоне якога гучаць патрабаваньні новых прэзыдэнцкіх выбараў, а Каардынацыйная рада прапануе дыялёг грамадзтва і ўлады, выказаўся Канстытуцыйны суд.
Паводле старшыні Канстытуцыйнага суду Пятра Міклашэвіча, Канстытуцыя Беларусі не прадугледжвае магчымасьці стварэньня грамадзкіх органаў і арганізацый, правамоцных пераглядаць вынікі прэзыдэнцкіх выбараў, перадае БелТА.
«Стварэньне Каардынацыйнай рады, якая вызначыла сабе за мэту перагляд выбараў прэзыдэнта Беларусі не ў парадку, вызначаным Канстытуцыяй і выбарчым заканадаўствам, зьяўляецца неканстытуцыйным. Мы зьвяртаем увагу, што ўсім грамадзянам і суб’ектам грамадзка-палітычных адносінаў неабходна выконваць рэжым канстытуцыйнай законнасьці», — папярэдзіў Пятро Міклашэвіч.
Раней сябра прэзыдыюму Каардынацыйнай рады Павал Латушка падкрэсьліваў, што грамадзянская плятформа не перасьледуе палітычных мэтаў і нацэленая на арганізацыю дыялёгу грамадзтва і ўлады. Генэральная пракуратура завяла крымінальную справу ў сувязьзю зь дзейнасьцю рады.
