Палітрада Аб’яднанай грамадзянскай партыі выступіла з заявай, у якой запатрабавала спыніць гвалт і забясьпечыць мірны пераход улады.
«У сытуацыі, калі народ Беларусі падняўся на масавыя пратэсты супраць фальсыфікацыі выбараў, палітрада АГП прызнае, што большасьць выбарнікаў прагаласавала супраць Лукашэнкі і падтрымала Сьвятлану Ціханоўскую, — гаворыцца ў партыйнай заяве. — Мы выказваем салідарнасьць з грамадзянамі, якія пратэстуюць супраць фальсыфікацый і абараняюць сваё права выбару».
Палітрада АГП асудзіла дзеяньні чальцоў выбарчых камісій, якія займаліся фальсыфікацыямі, і лічыць неабходным прыцягнуць іх да адказнасьці, у тым ліку ўжыць да іх кропкавыя санкцыі.
Таксама партыя асуджае гвалту да мірных ўдзельнікаў пратэсту і заклікае ўсіх ўстрымацца ад сілы.
У інтарэсах усёй дзяржавы ў заяве прапанавана пачаць дыялёг аб мірнай перадачы ўлады, што дазволіць спыніць гвалт і аднавіць канстытуцыйны парадак.
