Лінкі ўнівэрсальнага доступу

Чорная каса і махінацыі з аблігацыямі. На АНТ агучылі новыя абвінавачаньні супраць былога кіраўніцтва «Белгазпрамбанку»


Будынак «Белгазпрамбанку» ў Менску
Будынак «Белгазпрамбанку» ў Менску

У вечаровым выпуску навінаў тэлеканалу АНТ 13 чэрвеня расказалі пра «новыя акалічнасьці» справы «Белгазпрамбанку». Паводле тэлеканалу, сьледзтва вызначыла, што ў цэнтральным офісе банку доўгі час працавала «чорная каса», празь якую кіраўніцтва праводзіла закрытыя апэрацыі для легалізацыі незаконных даходаў.

Свабодзе не ўдалося апэратыўна атрымаць камэнтар юрыста штабу Бабарыкі Максіма Знака.​ 14 чэрвеня сказаў наконт сюжэту АНТ:

«Для гэтага ТВ-сюжэту каментароў не будзе. Тым, хто яго паглядзіць, і так усё будзе відавочна. Ня будзем марнаваць час».

Паводле АНТ, у адной з касаў «Белгазпрамбанку» валюту мянялі паводле заніжанага курсу для кіраўніцтва банку і vip-кліентаў.

«2 красавіка 2020 году на паседжаньні праўленьня банку па ўказаньні старшыні праўленьня Бабарыкі прынялі рашэньне пра выплату грашовых узнагароджаньняў кіруючым супрацоўнікам банку. Агульная сума такіх узнагароджаньняў склала каля 5 мільёнаў рублёў. У дзень пералічэньня прэмій (4 красавіка) у закрытых для абслугоўваньня іншых кліентаў банку галаўнога офісу касах з 11:00 да 12:35 быў ненатуральна зьніжаны курс апэрацый па замежнай валюце, у тым ліку пры выкарыстаньні банкаўскіх плястыкавых картаў», — сказаў начальнік упраўленьня ДФР КДК Юрый Мяхедаў.

Паводле Мяхедава, у гэтыя паўтары гадзіны кіраўніцтва банку набыла валюту па заніжаным курсу на суму больш як 1 мільён даляраў.

Паводле намесьніка начальніка ўпраўленьня Дэпартаменту фінансавых расьсьледаваньняў Камітэта дзяржкантролю Дзьмітрыя Дзягілева, адна са схемаў чорнай касы заключалася ў абмене валюты, атрыманай, як лічыць сьледзтва, злачынным шляхам, на аблігацыі «Белгазпрамбанку». Аўтарам гэтай схемы Дзягілеў назваў Бабарыку. Паволе сьледзтва, каб ня ўводзіць пры пакупцы пашпартных зьвестак і не трапляць у поле зроку органаў фінансавага кантролю, касірам банку казалі разьбіваць цану аблігацый на максымальна магчымыя для ананімнай пакупкі долі. «Касіры разумелі незаконнасьць сваіх дзеяньняў», — сьцьвярджаецца ў сюжэце.​

Таксама кіраўніцтва банку абвінавацілі ў фіктыўным продажы залатых зьліткаў і разьмен купюраў 200 і 500 эўра на драбнейшыя наміналы.​

9 ліпеня АНТ паказаў кадры вочнай стаўкі затрыманага патэнцыйнага кандыдата ў прэзыдэнты Віктара Бабарыкі з былым падначаленым Кірылам Бадзеем.​ Словаў Бабарыкі ў рэпартажы не паказалі. Паводле начальніка аддзелу сьледчага ўпраўленьня КДБ Канстанціна Бычака, кіраўнікі «Белгазпрамбанку» атрымлівалі адкаты ад кампаніі «ПрыватЛізінг».

Перасьлед Віктара Бабарыкі і яго прыхільнікаў. Што важна ведаць

  • Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
  • У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
  • 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
  • Віктар Бабарыка віны не прызнае.​

Хроніка перасьледу

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў, «​гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Фігурантамі «справы „Белгазпрамбанку“» сталі каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
  • 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
  • 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
  • Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
  • 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
  • Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
  • 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
  • 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
  • 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
  • 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
  • 12 ліпеня стала вядома, што Бабарыку этапавалі ў ПК №1 у г. Наваполацак.
  • 12 кастрычніка з ізалятараў выйшлі некалькі чалавек, затрыманых у справе «Белгазпрамбанку»​. Ім зьмянілі меру стрыманьня, але іншыя падрабязнасьці справы невядомыя.
  • У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG