У Беларусі вэтэранам Другой усясьветнай вайны выплацяць ад 360 да тысячы даляраў, у Расеі па тысячы даляраў заплацяць вэтэранам, у тым ліку і тым, хто жыве ў Літве, Латвіі і Эстоніі. Свабода паглядзела, як узнагароджваюць удзельнікаў Другой усясьветнай вайны ў Беларусі і ў суседзяў.
У Беларусі
На 1 красавіка 2019 году ў Беларусі жылі 6250 вэтэранаў Другой усясьветнай вайны. Людзей, якія лічацца пацярпелымі ад наступстваў Другой усясьветнай вайны, — 15 194 чалавекі.
Сёлета матэрыяльныя выплаты вэтэраны ў Беларусі маюць атрымаць з 1 красавіка па 1 траўня. Найбольшыя выплаты — 2500 рублёў, або крыху больш за 1 тысячу даляраў па цяперашнім курсе — атрымаюць вэтэраны, якія маюць званьне Героя Савецкага Саюзу. Год таму, па стане на 1 красавіка 2019 году, такіх у Беларусі было двое — Іван Кустаў і Васіль Мічурын.
Па 1700 рублёў атрымаюць:
- Людзі з інваліднасьцю і ўдзельнікі вайны, а таксама ўдзельнікі баявых дзеяньняў па абароне Айчыны да 3 верасьня 1945 году
- Асобы, якія ўдзельнічалі ў разьмініраваньні тэрыторыі і аб’ектаў пасьля вызваленьня ад акупацыі ў 1943–1945 гадах
Па 900 рублёў атрымаюць:
- Асобы, узнагароджаныя ордэнамі і мэдалямі СССР за самаадданую працу і вайсковую службу ў тыле ў гады вайны
- Асобы, якія працавалі на аб’ектах супрацьпаветранай абароны, будавалі абарончыя збудаваньні, марскія базы, аэрадромы ды іншыя вайсковыя аб’екты ў тылавых межах
- Асобы, якія працавалі ў Ленінградзе ў часы блякады і ўзнагароджаныя мэдалямі «За абарону Ленінграда» ці знакам «Жыхару блякаднага Ленінграду».
Па 700 рублёў выплацяць сем’ям вайскоўцаў, партызанаў, падпольшчыкаў, якія загінулі ці зьніклі бязь вестак у гады вайны, вязьням лягераў і гета, людзям, якія атрымалі інваліднасьць у часы вайны.
Калі ў людзей ёсьць права на некалькі такіх выплатаў, то ім прызначаецца найбольшая з магчымых.
Ва Ўкраіне
4,8 мільёна даляраў накіруюць на падтрымку вэтэранаў ва Ўкраіне. Выплаты тычацца вэтэранаў, якія маюць першую, другую ці трэцюю групы інваліднасьці, удзельнікаў баявых дзеяньняў, асобаў, якія маюць заслугі перад Айчынай, і сем’яў загінулых на вайне. Вэтэраны атрымаюць ад 30 да 150 даляраў (900–4120 грыўняў).
У Расеі
Ад 50 да 75 тысяч расейскіх рублёў, або ад 680 да 1030 даляраў, атрымаюць вэтэраны вайны і сем’і загінулых у вайне ў Расеі. Для вэтэранаў гэта сума ў 1030 даляраў, для вязьняў гета і турмаў — 680 даляраў.
Выплаты тычацца і вэтэранаў, якія жывуць у Літве, Латвіі і Эстоніі.
У Літве і Латвіі
У гэтых краінах не сьвяткуюць ні 8, ні 9 траўня на афіцыйным узроўні, бо ня лічаць гэта вызваленьнем ад акупацыі. Афіцыйная пазыцыя — скончылася нямецкая акупацыя і вярнулася савецкая.
Пры гэтым у Літве ўдзельнікі збройнага супраціву і ўдзельнікі баёў за свабоду маюць права на пэнсіі. Ім могуць прызначыць пэнсіі ад 166 да 232 эўра, а таксама яны маюць зьніжкі на транспарт. Гэта:
- Удзельнікі антысавецкага паўстаньня ў чэрвені 1941-га.
- Атрад абароны Айчыны (вясна-лета 1944-га).
- Паваенныя партызаны.
Савецкія вэтэраны ў Літве могуць разьлічваць на выплаты з боку Расеі. У Латвіі паводле закону аб статусе ўдзельніка Другой усясьветнай вайны людзі могуць разьлічваць на зьніжкі і сацыяльныя гарантыі, памер якіх вызначаюць мясцовыя органы ўлады.
Такі статус могуць атрымаць удзельнікі вайны як з аднаго, так і з другога боку, за выключэньнем тых, хто ўваходзіў у НСДАП, гестапа, КДБ, а таксама асуджаныя за злачынствы супраць міру і не рэабілітаваныя. Вэтэраны савецкага войска ў Латвіі таксама могуць атрымаць выплаты з Расеі.
У Польшчы
Вэтэраны ў Польшчы маюць дадатак да пэнсіі ў 229 злотых, або 54 даляры, а таксама кампэнсацыю аплаты электраэнэргіі ў 40 даляраў і іншыя кампэнсацыйныя выплаты. У дадатак да пэнсіі, такім чынам, на месяц выходзіць больш за 100 даляраў.
Таксама вэтэраны могуць разьлічваць на пэрыядычную штомесячную дапамогу ў памеры 285 даляраў (1200 злотых), а таксама выплаты ад мясцовых уладаў. На пэрыяд пандэміі асобна на іх падтрымку выдзелена каля 7 мільёнаў даляраў.
У іншых краінах
У Нямеччыне вэтэраны вэрмахту атрымліваюць ад 1600 да 9000 даляраў (тут і далей — у эквіваленце). У Вялікай Брытаніі штомесячныя выплаты вэтэранам складаюць ад 2200 да 10 000 даляраў.
У ЗША вэтэранам Другой усясьветнай вайны плацяць 1500 даляраў пэнсіі, і да гэтага існуе надбаўка ў 1200 даляраў.
У Францыі плацяць 1400 даляраў і штогадовую надбаўку ў 770 даляраў.
У Ізраілі вэтэраны Другой усясьветнай вайны атрымліваюць каля 1500 даляраў штомесячна. Апроч пэнсіі, вязьням лягераў выплачваецца штогод 300 даляраў на аздараўленьне.
