Расейскі пісьменьнік Барыс Акунін паведаміў у сваім фэйсбуку, што захварэў на каранавірус.
63-х гадовы расейскі пісьменьнік Барыс Акунін, аўтар папулярных дэтэктыўных раманаў і кніг па расейскай гісторыі, які апошнія гады жыве ў Вялікай Брытаніі, напісаў у сваім фэйсбуку:
«Я закінуў ФБ, таму што валяюся з моднай хваробай. Крыху ўмацуюся — абавязкова падзялюся ўражаньнямі. (Спойлер: страх перад каранавірусам значна страшнейшы самога каранавірусу. Асьцярожным быць трэба, а панікаваць ня варта)».
Тры тыдні таму Акунін у фэйсбуку выказаў скептычнае стаўленьне да пандэміі каранавірусу:
«Сапраўднай эпідэміяй — не, пандэміяй — цяпер, па-мойму, зьяўляецца не каранавірус, а сусьветная гістэрыка, выкліканая гэтай нечувана небясьпечнай заразай, якая ўразіла — страшна вымавіць — 0,000013% сусьветнага насельніцтва.
У Эўропе больш за ўсё пацярпела Італія, дзе памерлі 197 чалавек, і італьянцы, здаецца, у абсалютнай паніцы. (Прытым што ад звычайнага грыпу ў 2013-17 гг. памерлі больш як 68 000 чалавек).
Ад адных нэрваў пачаўся сусьветны фінансавы крызіс, які закране многія мільёны людзей, кагосьці давядзе да галечы, кагосьці пакіне бяз працы. І гэта несумненна яшчэ толькі кветачкі. Галоўнае наперадзе.
Усё больш пераконваюся: галоўная праблема сучаснага чалавецтва — інфантыльная ўнушальнасьць і любоў да статкавага страху.
А зрэшты, давайце праверым» — напісаў Акунін 7 сакавіка.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
