У Лідзе паставілі помнік Гедзіміну. Адкрыюць яго 7 верасьня падчас Дня гораду.
Гедзімін — вялікі князь літоўскі ў 1316–1341 гадах, які ўдвая павялічыў тэрыторыю ВКЛ. Падчас яго кіраваньня мураваныя замкі зьявіліся ў Лідзе, Медніках, Крэве і Віцебску.
Помнік паставілі на пляцоўцы ля Лідзкага замку. Сёньня пачаліся працы па ўсталяваньні бронзавай коннай скульптуры вагай каля 3 тонаў і вышынёй да 6 мэтраў. Пастамэнт помніку будзе абліцаваны гранітам у колер Лідзкага замку. На ім будзе надпіс «Гедымін» і герб «Калюмны». Помнік усталёўваюць на грошы лідзкага прадпрыемства «Белтэкс оптык».
Помнік зрабілі па эскізе скульптараў Вольгі Нячай і Сяргея Аганава, якія выйгралі ў конкурсе на стварэньне помніка ад Лідзкага райвыканкаму. Нячай і Аганаў – аўтары мэмарыялу ў Курапатах, усталяванага летась.
