Сакрэт доўгага жыцьця можа хавацца ня ў тым, што вы ясьце, але ў тым, калі вы ясьце. Пра гэта на сайце sharecare. com піша Тэйлар Лупаў.
Пэрыядычнае галаданьне або абмежаваньне ежы практыкуецца са старажытных часоў у многіх рэгіёнах сьвету. Гэтая практыка зьвязана з рэлігіяй, але апошнім часам навукоўцы сьцьвярджаюць, што яна мае і вялікую карысьць для здароўя.
Страта вагі
Каб атрымаць найбольш карысьці ад пэрыядычнага галаданьня, трэба зразумець, што больш важна тое, калі мы ямо, чым тое, што мы ямо. У прынцыпе, заўсёды трэба трымацца здаровай дыеты, якая ўключае ў сябе гародніну, посны бялок і суцэльнае збожжа.
лёгкі стрэс, зьвязаны з галаданьнем, прыносіць арганізму такую самую карысьць, як і фізычныя практыкаваньні
Сёньня існуе шмат варыянтаў пэрыядычнага галаданьня або абмежаваньня ежы. Некаторыя зь іх прадугледжваюць абмежаваньне спажыванай энэргіі да 500 калёрый у дзень два разы на тыдзень. Іншыя заклікаюць адмовіцца ад ежы на 24 гадзіны адзін або два разы на тыдзень. А ёсьць і такія, што абмяжоўваюць сам час прыняцьця ежы да 8 гадзінаў кожны дзень, пакідаючы 16 гадзінаў на галаданьне.
Прычыны карысьці пэрыядычнага галадаваньня да канца лекарам няясныя. Нехта мяркуе, што лёгкі стрэс, зьвязаны з галаданьнем, прыносіць арганізму такую самую карысьць, як і фізычныя практыкаваньні. Іншыя кажуць, што абмежаваньне ў ежы запускае мэханізм самааздараўленьня клетак.
Таксама важна, што абмежаваньне спажываных калёрый павялічвае імунітэт і здольнасьць арганізму процістаяць хваробам.
Ну і вельмі важна, што пэрыядычнае галаданьне дапамагае зьнізіць вагу і пасьпяхова змагаецца з атлусьценьнем.
Здароўе сэрца
Якраз залішняя вага ўплывае найболей на здароўе сэрца і выклікае высокі ціск.
І, аказваецца, пэрыядычнае галаданьне таксама вельмі пазытыўна ўплывае на сэрца. Ёсьць ужо цэлыя дасьледаваньні, якія паказваюць, што людзі, якія пэрыядычна галадаюць, маюць больш здаровую сардэчна-сасудзістую сыстэму.
Адносна мэханізму гэтага мэдыкі таксама спрачаюцца. Некаторыя лічаць, што галаданьне зьніжае ўзровень дрэннага халестэрыну, а таксама запаленьня і ўстойлівасьці да інсуліну.
Павелічэньне працягласьці жыцьця
Дасьледаваньні паказваюць, што абмежаваньне калярыйнасьці ежы станоўча ўплывае на працягласьць жыцьця. Мэханізм гэтага да канца таксама пакуль няясны. Лічыцца, што галаданьне змагаецца з эфэктамі старэньня на клетачным узроўні.
Абмежаваньне калярыйнасьці ежы і пэрыядычнае галаданьне зьніжае пашкоджаньне ДНК, паскарае выпрацоўку камлёвых клетак і абараняе клеткі мозгу.
