Лінкі ўнівэрсальнага доступу

У Менску праходзіць канфэрэнцыя ПА АБСЭ ў падтрымку кітайскага праекту «Шаўковы шлях»


Міжнародная канфэрэнцыя ПА АБСЭ, прысьвечаная «Шаўковаму шляху», у Баку. 2017 год
Міжнародная канфэрэнцыя ПА АБСЭ, прысьвечаная «Шаўковаму шляху», у Баку. 2017 год

Беларусь разьлічвае на транзытную ролю ў кітайскім лягістычным праекце і дадатковыя інвэстыцыі.

Дэпутаты з 24 краін, якія ўваходзяць у Парлямэнцкую асамблею АБСЭ, правядуць сёньня ў Менску адмысловую канфэрэнцыю «Адзін пояс — адзін шлях: паглыбленьне супрацоўніцтва ў імя ўстойлівага разьвіцьця і росквіту».

Яе арганізуе група падтрымкі «Шаўковага шляху», якую стварылі ў 2017 годзе ў Менску падчас правядзеньня тут штогадовай сэсіі Парлямэнцкай асамблеі АБСЭ. За гэты час колькасьць удзельнікаў групы ўзрасла з 17 да 24 краінаў. Першая падобная канфэрэнцыя прайшла летась у Баку.

На сустрэчы чакаюць старшыню ПА АБСЭ, грузінскага дэпутата Георгія Цэрэтэлі, і кіраўніка групы падтрымкі «Шаўковага шляху», парлямэнтара з Азэрбайджану Азая Гуліева.

Дэпутаты будуць абмяркоўваць магчымы ўнёсак сваіх краін у гэты кітайскі праект.

Што такое «Шаўковы шлях»?

Вялікі шаўковы шлях — так называлася караванная дарога, што зьвязвала Ўсходнюю Азію зь Міжземнамор’ем у старажытнасьці і ў Сярэднявеччы. У першую чаргу гэты маршрут выкарыстоўваўся для вывазу шоўку з Кітаю, з чым і зьвязана яго назва.

У рамках сучаснай кітайскай стратэгічнай праграмы «Адзін пояс — адзін шлях» распрацоўваецца шэраг праектаў марскіх і сухапутных шляхоў паміж Эўропай і Кітаем пад агульнай назвай «Новы шаўковы шлях».

Роля Беларусі ў «Шаўковым шляху»

Намесьнік старшыні Палаты прадстаўнікоў Баляслаў Пірштук заяўляў, што ўлады Беларусі хочуць паказаць у гэтым праекце інвэстыцыйную І транзытную прывабнасьць краіны.

Беларусь хоча стаць мостам для сувязі Захаду і Ўсходу. Да таго ж ёсьць жаданьне скарыстацца магчымасьцямі беларуска-кітайскага парку высокіх тэхналёгіяў «Вялікі камень».

Экспэрт: марскі шлях, які абмінае Беларусь, для кітайцаў лепшы

Кандыдат гістарычных навук Яўген Красулін скептычна ставіцца да спадзяваньняў беларускіх уладаў.

Яўген Красулін
Яўген Красулін

«Калі паглядзець на мапу, то, з аднаго боку, мы сапраўды можам служыць такім мастком. Кітай прытрымліваецца важнага прынцыпу — па магчымасьці перасякаць пастаўкамі сваіх грузаў як мага менш краін. Таму маршрут чыгункай праз Расею (і, натуральна, празь Беларусь), каб пастаўляць свае тавары ў Эўропу, выглядае на першы погляд лягічным. Але такі варыянт прымушае Кітай дамаўляцца з расейскай, беларускай і эўрапейскай бюракратыяй. Да таго ж Расея нядаўна падняла тарыфы на перавозкі грузаў па сваёй чыгунцы. Кітайцы з гэтага нічога добрага ня бачаць», — тлумачыць экспэрт.

Яўген Красулін зьвяртае ўвагу на тое, што кітайцы знайшлі іншы варыянт.

«Яны зараз будуюць новы шлях да найбліжэйшага порта. Гэтая дарога вядзе толькі праз адну краіну — Пакістан — да порта Карачы. І адтуль морам можа накіроўваць грузы на рынкі Афрыкі, Блізкага Ўсходу, Эўропы. Гэта значна прасьцей і, відаць, таньней. І, калі параўноўваць два шляхі, то мне падаецца, кітайцы спыняцца на марскім», — мяркуе Яўген Красулін.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG