Следчы камітэт Беларусі завёў крымінальную справу па факце пашкоджаньня мэмарыяльных аб’ектаў ва ўрочышчы Курапаты. Пра гэта ведамства паведаміла ў афіцыйным Telegram-канале.
«У межах крымінальнай справы прызначаны шэраг экспэртыз, вытворчасьць якіх даручаная экспэртам УГКСЭ па Менскай вобласьці. Комплекс сьледчых і працэсуальных дзеяньняў, накіраваных на ўстанаўленьне фактычных абставінаў здарэньня, працягваецца», — гаворыцца ў паведамленьні СК.
Крымінальная справа заведзеная паводле ч. 1 арт. 344 Крымінальнага кодэксу Беларусі.
23 сакавіка актывісты выявілі, што невядомыя намалявалі фарбай «зоркі Давіда» і антысэміцкія надпісы на афіцыйным памятным знаку і помніку габрэйскім ахвярам НКВД ва ўрочышчы Курапаты. Актывісты зьвярнуліся ў міліцыю. Пазьней росьпіс такой жа сіняй фарбай быў выяўлены і з другога боку ўрочышча, на камяні з крыжом.
Пазьней кроплі фарбы падобнага колеру абаронцы Курапатаў пабачылі каля ўваходу на тэрыторыю рэстарацыі «Поедем поедим». Сьледчыя, якія прыяжджалі на месца здарэньня, узялі фарбу на аналіз.
20 сакавіка ў Курапатах невядомыя павалілі адразу 14 крыжоў. Двойчы ад пачатку году быў пашкоджаны мэмарыяльны знак ад прэзыдэнта ЗША «лава Клінтана».
Курапаты
Курапаты — урочышча пад Менскам, дзе ў 1937–1941 гадах карнікі НКВД расстралялі, паводле розных падлікаў, ад 40 да 200 тысяч чалавек.
У красавіку — траўні 1988 году ў лясным масіве Курапаты былі знойдзены астанкі людзей, гэтыя факты хутка сталі шырока вядомыя, дзякуючы дзейнасьці Зянона Пазьняка і грамадзкай арганізацыі «Мартыралёг Беларусі».
У чэрвені 1988 году створана ўрадавая камісія, і пракуратурай БССР узбуджана крымінальная справа па выяўленых фактах.
У працэсе расьследаваньня, як пацьверджана ў інфармацыйным паведамленьні Генэральнай пракуратуры Рэспублікі Беларусь у чэрвені 1996 году, устаноўлена, што тут з 1937 па 1941 супрацоўнікі НКУС БССР расстрэльвалі рэпрэсаваных жыхароў рэспублікі.
Пры аглядзе ляснога масіву выяўлена, што на тэрыторыі каля 30 га разьмешчана 510 пахаваньняў, з якіх у часе эксгумацыі праверана 8 і ў 6 з іх знойдзены шкілетныя астанкі людзей, адзеньне і іншыя асабістыя рэчы загінуўшых.
Ва ўшанаваньне памяці ахвяр пастаўлены крыжы, іншыя мэмарыяльныя знакі, шчыты з надпісамі.
У Курапатах неаднойчы чыніліся факты вандалізму.
