Кіраўнік краіны Аляксандар Лукашэнка зрабіў шэраг кадравых прызначэньняў 12 лютага: новых сваіх памочнікаў, некаторых кіраўнікоў мясцовых адміністрацый, дырэктараў прадпрыемстваў і амбасадараў.
Новы дырэктар БелОМА
Новым гендырэктарам «БелОМА» стаў 43-гадовы Аляксандар Мароз. Раней ён займаў пасаду першага намесьніка дырэктара холдынгу.
Пасьля таго, як былога гендырэктара «БелОМА» Вячаслава Бурскага затрымалі і пасадзілі пад варту, Мароз выконваў абавязкі гендырэтара.
Раней камэнтуючы затрыманьне Вячаслава Бурскага, генпракурор Аляксандар Канюк не патлумачыў у чым яго падазраюць, маўляў, «трэба разабрацца толкам у сытуацыі».
Да сёньняшняга дня Вячаслаў Бурскі на афіцыйным сайце холдынгу па-ранейшаму быў паказаны як гендырэктар ААТ «БелОМА».
Холдынг «БелОМА» спэцыялізуецца на выпуску оптыкі, у тым ліку для вайсковых патрэбаў, а таксама робіць бытавыя лічыльнікі і дэталі для аўтамабіляў.
Новыя амбасадары ў Польшчы і ў Гішпаніі
Новым амбасадарам Беларусі ў Польшчы стаў Уладзімер Чушаў (раней быў Аляксандр Авяр’янаў).
Раней ён працаваў начальнікам упраўленьня міжнароднага супрацоўніцтва і нацыянальнай бясьпекі Савета рэспублікі.
Таксама раней Чушаў быў амбасадарам Беларусі ў Чарнагорыі і Рэспубліцы Македонія па сумяшчальніцтве.
Амбасадарам Беларусі ў Гішпаніі і па сумяшчальніцтве пастаянным прадстаўніком Беларусі пры Усясьветнай турысцкай арганізацыі прызначаны Павал Пуставы. Раней абавязкі пасла ў Гішпаніі выконваў пасол у Францыі.
Таксама пасол Беларусі ў Аўстрыі, пастаянны прадстаўнік Беларусі пры міжнародных арганізацыях у Вене Алена Купчына будзе прадстаўляць інтарэсы Беларусі ў Славеніі, у АБСЭ.
Пашырана сфэра адказнасьці пасла Беларусі ў Вугоршчыне і па сумяшчальніцтве ў Босьніі і Герцагавіне Аляксандра Панамарова і пасла Беларусі ў Японіі Руслана Есіна.
Першы прызначаны паслом па сумяшчальніцтве ў Харватыі, другі — па сумяшчальніцтве ў Аўстраліі і Новай Зэляндыі.
Два новыя памочнікі прэзыдэнта
Новымі памочнікамі прэзыдэнта прызначаныя Анатоль Маркевіч (памочнікам, інспэктарам па Берасьцейскай вобласьці) і Віталь Прыма (памочнікам, інспэктарам па Менску).
Раней Анатоль Маркевіч узначальваў Наваградзкі райвыканкам.
На пасадзе старшыні Наваградзкага райвыканкаму Анатоль Маркевіч адмовіўся перайменаваць вуліцу ў гонар беларускага навукоўца Барыса Кіта, палічыў гэта немэтазгодным.
У мінулым годзе ён ініцыяваў малебен за дождж.
Цяперашні старшыня Берасьцейскага аблвыканкаму Анатоль Ліс раней таксама ўзначальваў Наваградзкі райвыканкам.
Віталь Прыма быў першым беларускім амбасадарам у Індыі, акрэдытаваным у Шры-Ланцы і Нэпале па сумяшчальніцтве. Быў намесьнікам міністра прамысловасьці.
Новы намесьнік Шэймана
Аляксандр Лукашэнка прызначыў таксама Андрэя Сьвірыдава намесьнікам кіраўніка справамі прэзыдэнта Беларусі.
Раней Андрэй Сьвірыдаў працаваў старшынёй камітэта эканомікі Горадзенскага аблвыканкама.
