Дзяржсакратар «Саюзнай дзяржавы» Беларусі і Расеі Грыгорый Рапота заявіў, што для беларусаў і расейцаў захаваецца свабоднае перасячэньне мяжы паміж дзьвюма краінамі.
Чыноўнік пракамэнтаваў беларуска-расейскае пагадненьне аб узаемным прызнаньні візаў, пацьвердзіўшы, што гэты дакумэнт плянуецца падпісаць да канца 2018 году.
«Для беларусаў і расейцаў свабода перасоўваньня захоўваецца, — цытуе Рапоту БелТА. — Да канца 2018 году, як запэўніваюць міністры замежных спраў нашых краін, будзе падпісана адпаведнае пагадненьне, якое ўпарадкуе і аблегчыць парадак перасячэньня мяжы для грамадзян трэціх краін».
Рапота дадаў, што пагадненьне створыць умовы для разьвіцьця бізнэсу і турызму, у тым ліку ў памежных абласьцях Беларусі і Расеі.
Расея ініцыявала стварэньне міжнароднага пункту пропуску на мяжы Смаленскай вобласьці і Беларусі ў пасёлку Красная Горка. Цяпер гэта пераход выключна для расейцаў і беларусаў, а каб трапіць у Смаленск, іншаземцу неабходна зрабіць «крук» у 800 кілямэтраў — праз Гомель і адтуль на міжнародны пункт пропуску «Новыя Юркавічы».
Паводле Смаленскай абласной адміністрацыі, гэта адмоўна адбіваецца на турыстычнай галіне і прыцягненьні інвэстыцый у рэгіён.
Якім чынам будзе адбывацца надгляд транспарту і ці давядзецца паказваць дакумэнты ўсім, незалежна ад грамадзянства, аўтары ініцыятывы пакуль ня кажуць.
