«Чытайце наш сайт» і «пакажыце дакумэнты, што маеце паўнамоцтвы такое патрабаваць».
На сайце Petitions.by апублікаваны адказ намесьніка міністра аховы здароўя Беларусі Вячаслава Шылы на пэтыцыю з патрабаваньнем адкрытага расьсьледаваньня сытуацыі вакол ужываньня ў Беларусі незарэгістраваных прышчэпак «Эўпэнта».
Пэтыцыя зьявілася пасьля публікацыі на сайце «Ежедневник» расьсьледаваньня аб «Эўпэнце», якую ўжывалі ў Беларусі без рэгістрацыі. Міністэрства здароўя сьцьвярджае, што прышчэпка прэкваліфікаваная Ўсясьветнай арганізацыяй здароўя, таму яе можна было ўжываць у Беларусі. Увага да прышчэпкі была надзвычайнай, бо пасьля ўжываньня прышчэпкі памерлі два дзіцяці (афіцыйна сьцьвярджаецца, што ў гэтым не вінаватыя прышчэпкі).
У адказе на пэтыцыю, якую падпісалі больш за 2200 чалавек, Вячаслаў Шыла паведамляе, што на сайце Міністэрства аховы здароўя ёсьць тры навіны пра «Эўпэнту» (адна пра брыфінг аб сытуацыі з прышчэпкай, на якім выкарыстаньне незарэгістраванай вакцыны растлумачылі «надзвычайнай сытуацыяй», і дзьве навіны пра візыты прадстаўнікоў фармакалягічных кампаніяў).
Дадаткова ён інфармуе, што «да электронных зваротаў, пададзеных прадстаўнікамі заяўнікаў, мусяць быць далучаныя электронныя копіі дакумэнтаў, якія пацьвярджаюць іхныя паўнамоцтвы».
Пэтыцыю таксама накіроўвалі ў Сьледчы камітэт — той раней паведамляў, што праверыць парадак закупкі «Эўпэнты» і паходжаньне сэртыфікацыі.
Скандал з карэйскай вакцынай у Беларусі. Што важна ведаць
- 13 жніўня ў Ганцавіцкім раёне двухмесячны хлопчык памёр пасьля прышчэпкі. 14 жніўня дзяўчынка такога ж узросту трапіла ў рэанімацыю пасьля плянавай прышчэпкі. Пазьней стала вядома, што ў траўні пасьля прышчэпкі «Эўпэнты» памерла чатырохмесячная дзяўчынка.
- Вакцыны бароняць ад шматлікіх вірусаў. Пра некаторыя інфэкцыйныя хваробы забыліся толькі таму, што ёсьць прышчэпкі. Калі перастаць прышчапляцца, інфэкцыі досыць хутка вяртаюцца.
- Аднак у мэдыцыне зрэдку, кажуць спэцыялісты, здараюцца такія трагедыі, як у Ганцавічах, калі мае месца індывідуальная рэакцыя, не зьвязаная зь якасьцю прэпарату.
- На пэрыяд расьсьледаваньня выкарыстаньне ў Беларусі імунабіялягічных сродкаў «Эўпэнта» той сэрыі, прышчэпкі зь якой былі ўведзеныя пацярпелым дзецям, прыпынілі. Карэйскую вакцыну «Эўпэнта» Мінздароўя закупіла замест расейскай АКДС у 2017 годзе.
- Часопіс «Ежедневник» апублікаваў расьсьледаваньне ў дзьвюх частках, у якім сьцьвярджае, што вакцына незарэгістраваная ў Беларусі і не праходзіла праверак у краіне. Цэнтар экспэртызаў і выпрабаваньняў у ахове здароўя пацьвердзіў гэта Свабодзе.
- З нагоды публікацыяў «Ежедневника» Мінздароўя зьвярнулася ў пракуратуру. Сьледчы камітэт тым часам правярае парадак закупкі, якасьць і сэртыфікацыю вакцыны, як таго ў пэтыцыі патрабавалі дзьве тысячы беларусаў.
- 10% лекавых сродкаў трапляюць у Беларусь без рэгістрацыі.
- Мінздароўя палічыла дастатковым тое, што вакцына прайшла праверку якасьці Ўсясьветнай арганізацыяй здароўя. Аднак, згодна зь беларускім заканадаўствам, гэтага не дастаткова для выкарыстаньня яе ў краіне ў штатаных сытуацыях. 29 жніўня Мінздароўя патлумачыла выкарыстаньне вакцыны «надзвычайнай сытуацыяй».
- Пасьля трагедыі ў Ганцавіцкім раёне і скандал з вакцынай сям’я зь Менску расказала пра сьмерць дачкі, якой таксама ўвялі карэйскую вакцыну «Эўпэнта».
- Усё гэта адбываецца на тле карупцыйнай «справы лекараў», у якой падазраванымі ў хабарах на сотні тысячаў даляраў праходзяць кіраўнікі шматлікіх мэдычных установаў Беларусі і чыноўнікі Міндзароўя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў