«Навёўшы парадак» у беларускім спорце, Аляксандар Лукашэнка ўзяўся за міжнародны.
Прымаючы генэральнага сакратара Міжнароднай фэдэрацыі баскетболу (FIBA) Патрыка Баўмана, кіраўнік Беларусі выказаў свае прэтэнзіі да Міжнароднага алімпійскага камітэту (МАК):
«Мне здаецца, гэтая структура ня проста бюракратычная, яна часам безадказная. Там вельмі хутка „бранзавеюць“ людзі, знаходзячыся на гэтай пасадзе. І я як кіраўнік Нацыянальнага алімпійскага камітэту вымушаны на чарговым мерапрыемстве давесьці (гэта) да ведама міжнароднай спартовай грамадзкасьці».
Ня першы раз Аляксандар Лукашэнка абураецца міжнароднымі спартовымі арганізацыямі, выкрывае змовы. Яшчэ ў першыя гады прэзыдэнцтва, калі на спаборніцтве па спартыўнай хадзе за парушэньні правілаў быў зьняты з дыстанцыі беларускі спартовец, кіраўнік Беларусі заявіў:
«Мяне дагэтуль трасе... Тым больш што гэта зрабіў расейскі судзьдзя. Я скажу, што гэта прадмет адмысловай гутаркі, у тым ліку і з кіраўніцтвам Расеі».
Падчас паездкі на Алімпійскія гульні ў японскі горад Нагана ў 1998 годзе Лукашэнку да глыбіні душы абурыла, што спаборніцтвы па біятлёне былі спыненыя з прычыны дрэннага надвор’я:
«Міжнародная мафія перакрэсьліла гонку, як толькі ўбачыла, што перамагаюць беларусы. Яны нам паўтараюць аб дэмакратыі, у іх і ня пахне гэтым. Імпэрыі дзеляць мэдалі, а ў нас няма вялікай краіны за сьпінай».
Не спадабалася прэзыдэнту і судзейства ў спаборніцтвах па фрыстайле:
«Тут няма ніякай сумленнасьці і прыстойнасьці. Наш хлопец павінен быў заняць як мінімум другое месца».
Тэма судзейства ў фрыстайле прыцягнула ўвагу Лукашэнкі і падчас зімовых Алімпійскіх гульняў гэтага году. Ён палічыў, што несправядліва паставіліся да беларуса Антона Кушніра.
18 лютага, падчас сустрэчы з журналістамі на выбарчым участку, Лукашэнка заявіў:
«Яны проста, адкрыта вам скажу як чалавек, які трохі ў гэтым разьбіраецца, выкінулі галоўнага канкурэнта зь фіналу... Мне давялося ноччу падняць па трывозе МЗС, задзейнічаць пасольства ў Рэспубліцы Карэя. Накіраваць неадкладна ўрадавую тэлеграму ў адрас Баха (прэзыдэнт МАК. — Аўт.). Выказаў яму ўсё, як я думаю, у мяккай форме. Мы гэта ўсё апублікуем. Мы хаваць гэта ня будзем... Вы ж бачылі, хто менавіта судзіць: чалавек з Швайцарыі, Расеі, Кітаю... А іх прадстаўнікі якраз супернічаюць з намі. Усе яны працягнулі ў фінал сваіх спартоўцаў».
Ён дадаў, што можа зразумець судзейства швайцарцаў, ня вельмі разумее «кітайскіх сяброў» і «адмаўляецца разумець нашых старэйшых братоў — расіян».
«Трэба другога расіяніна зацягнуць. Коштам беларуса?! Навошта? Вось маральная пазыцыя судзьдзяў. Таму гэта суцэльнае бязладзьдзе, я яго інакш растлумачыць не магу», — падсумаваў Лукашэнка.
І вось зноў кіраўнік Беларусі раскрытыкаваў МАК за «ператварэньне спорту ў частку бруднай палітыкі» і за «абвінавачаньне цэлай каманды» ва ўжываньні допінгу.
Гэтае пэрыядычнае выкрываньне Лукашэнкам змоваў і мафіі ў міжнародным спартовым руху тлумачыцца некалькімі чыньнікамі. Найперш, варта адзначыць, што ён аддае спорту больш увагі, чым эканоміцы, гэта такая ягоная любімая цацка. «Няма ніводнай краіны ў сьвеце, дзе б пытаньні разьвіцьця спорту вырашаліся на такім высокім узроўні», — казаў кіраўнік Беларусі і ў той жа час прэзыдэнт Нацыянальнага алімпійскага камітэту. Гэткі падвойны статус, як ён лічыць, надае яму права ўплываць на міжнародны спорт.
А зь іншага боку, з кожным годам посьпехі беларускіх спартоўцаў на міжнародных спаборніцтвах усё меншыя. Алімпійскіх мэдалёў з Алімпійскіх гульняў з кожным разам прывозіцца меней. Павялічваецца колькасьць допінгавых скандалаў. Паглядзіце, напрыклад, што адбываецца з футболам і хакеем Беларусі. І ў Лукашэнкі ўзьнікае адчуваньне, што ў яго адбіраюць гэтую яго любімую цацку. Адсюль і гучны пратэст.
А калі нешта не атрымліваецца, то, як ён часта лічыць, галоўная прычына — змова ворагаў.
Да таго ж тут існуе і піяраўскі складнік. Заўзятар, калі прайграе ягоная любімая каманда, часта робіць выснову: «Засудзілі», «Судзьдзю на мыла». Таму Лукашэнка ўпэўнены, што шараговы абывацель, які заўзее каля тэлевізара, яго падтрымае.
Раней Лукашэнка ня раз папракаў расейскіх судзьдзяў. Цяпер жа ён фактычна выступіў у абарону Расеі, крытыкуючы «абвінавачаньне цэлай каманды» ва ўжываньні допінгу. Нагадаю, што зборную РФ адхілілі ад удзелу ў зімовых Алімпійскіх гульнях 2018 г. Таму ягоныя цяперашнія заявы спадабаюцца Маскве.
Асабліва пацешыў ягоны папрок, што ў кіраўніцтве МАК «вельмі хутка „бранзавеюць“ людзі, знаходзячыся на гэтай пасадзе». У беларуса адразу ж узьнікаюць непрыемныя для Лукашэнкі аналёгіі і паралелі. Невыпадкова, што гэтая фраза выкінутая з афіцыйнага паведамленьня БЕЛТА і прэсавай службы прэзыдэнта. Але ў інфармацыі расейскага ТАСС яна засталася.
Меркаваньні, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў