Літва дабудавала агароджу на мяжы з Калінінградзкай вобласьцю. Пра гэта паведамляе расейская служба Бі-бі-сі. Працягласьць збудаваньня складае 45 кілямэтраў, вышыня — два мэтры. Узьвядзеньне загароды абышлося Вільні ў 1,3 мільёна эўра.
Літоўскія памежнікі ў інтэрвію Бі-бі-сі паведамілі, што агароджа трэба для барацьбы з нелегальнай іміграцыяй і кантрабандай цыгарэт. Пры гэтым яна непрыдатная для прадухіленьня верагоднай ваеннай пагрозы з боку Расеі.
Плот стаіць там, дзе няма прыродных перашкодаў. Акрамя таго на мяжы устаноўлены камеры сачэння.
Паводле Бі-бі-сі, у 2017 годзе пагранічнікі зафіксавалі 18 выпадкаў незаконнага перасячэньня мяжы паміж Літвой і Расеяй. Было знойдзена восем тысяч пачак кантрабандных цыгарэт.
Да 2020 году літоўскія ўлады плянуюць узьвесьці і агароджу на мяжы з Беларусьсю. Такія ж пляны мае і Латвія.
