Навукоўцы ў Кітаі ўпершыню ў сьвеце правялі апэрацыю рэдагаваньня генаў эмбрыёна. Гэта дазволіла не дапусьціць разьвіцьця спадчыннага захворваньня, паведамляе тэлеканал Бі-Бі-Сі.
Пры гэтым упершыню быў пасьпяхова ўжыты мэтад рэдагаваньня азоцістых асноваў. Зь яго дапамогай была выпраўленая адзіная памылка ў трох мільярдах «літараў» генэтычнага коду чалавека.
Гэткае рэдагаваньне зьмяняе базавыя «будаўнічыя блёкі» ДНК — азоцістыя асновы. Іх чатыры — адэнін, цытазін, гуанін і тымін. Калі адна з такіх асноваў зьявіцца ў геноме не за сваім месцы — адбываецца парушэньне коду. Кітайскім дасьледнікам удалося выправіць памылку, замяніўшы памылковую аснову на адпаведную.
Паводле кітайскіх навукоўцаў, новая тэхналёгія дазволіць пазьбегнуць многіх спадчынных хвароб.
Раней у генным рэдагаваньні ўжывалася мэтодыка CRISPR-Cas, якая разбурае ДНК, а калі арганізм спрабуе аднавіць яго, дэзактывуецца набор генэтычных інструкцыяў, што дазваляе ўвесьці новую генэтычную інфармацыю.
Дасьледнікі лічаць, што новая мэтодыка рэдагаваньня азоцістых асноваў больш эфэктыўная і выклікае менш непажаданых эфэктаў, чым CRISPR-Cas.
Апэрацыю праводзілі на вырашчаных у лябараторыі эмбрыёнах. У іх ДНК была мутацыя, якая прыводзіла да разьвіцьця бэта-таласэміі. Гэта цяжкае генэтычнае захворваньне, якое зьяўляецца з прычыны мутацый і прыводзіць да парушэньня выпрацоўкі гемаглябіну ў арганізьме.
