«Малады Фронт» быў створаны 6 верасьня 1997 году. Удзельнікі ўстаноўчага зьезду расказваюць, што першапачаткова хацелі правесьці яго ў Дзень беларускай вайсковай славы 8 верасьня, аднак гэтая дата прыпала на будны дзень, таму зьезд вырашылі перанесьці на 6-га.
Штуршком да стварэньня арганізацыі сталі падзеі вясны 1997 году, калі акцыі пратэсту праходзілі ў Менску ледзь не штотыдзень. «Людзі ў той час былі вельмі азлобленыя на ўлады. Выходзілі з жаданьнем паштурхацца, нават пабіцца з праваахоўнікамі. Мы лёгка маглі пасьля мітынгу пайсьці шэсьцем да амбасады Расеі і пікетаваць яе», — успамінае Аляксей Янукевіч.
У выніку ідэя стварыць моладзевую апазыцыйную арганізацыю была рэалізаваная за некалькі месяцаў паездак па рэгіёнах. Ужо праз два гады толькі ў Менску налічвалася больш за 200 актыўных сябраў «Маладога Фронту», яшчэ прыкладна столькі ж іх было ў рэгіёнах.
