Эўразьвяз пачаў штрафную працэдуру адносна Вугоршчыны з прычыны закона аб вышэйшай адукацыі, які паставіў пад пагрозу заснаваны мэцэнатам Джорджам Сорасам Цэнтральна-Эўрапейскі ўнівэрсытэт.
Як паведамляе агенцтва Reuters, у Будапэшт быў накіраваны ліст з паведамленьнем аб пачатку праверкі. Само разьбіраньне можа зацягнуцца на некалькі гадоў.
У Брусэлі лічаць, што вугорскі ўрад парушае нормы ЭЗ аб прадстаўленьні паслуг. На думку крытыкаў новага закону аб адукацыі, ён накіраваны на ліквідацыю незалежнага Цэнтральна-Эўрапейскага ўнівэрсытэту. Паводле слоў прэм’ер-міністра Віктара Орбана, той факт, што навучальная ўстанова выдае амэрыканскі і эўрапейскі дыплёмы, робіць канкурэнцыю з вугорскімі ВНУ несумленнай.
Эўрапейская камісія пагражае падаць на Вугоршчыну ў суд з прычыны новых мер.
У падтрымку ўнівэрсытэту выступіла амбасада ЗША ў Вугоршчыне, Дзяржаўны дэпартамэнт ЗША і Вугорская акадэмія навук. У вугорскім урадзе ўжо прапанавалі кампраміс — выдаваць дыплёмы праз партнэрскую школу. Ва ўнівэрсытэце заявілі, што гатовыя да перамоваў, але наўпрост ўлады да іх не зьвярталіся.