Лінкі ўнівэрсальнага доступу

Літоўцы вучыліся змагацца зь «зялёнымі чалавечкамі» пад беларускай мяжой


Вучэньні ў Салечніках (Шальчынінкай), Літва

Міністэрства ўнутраных спраў Літвы праводзіць вучэньні пад беларускай мяжой у Салечніках па дарозе зь Вільні на Ліду. Дэталёвы фотарэпартаж з вучэньняў публікуе Delfi.

Паводле легенды, якую агучыў міністар унутраных спраў Эймуціс Місюнас, «зялёныя чалавечкі» ўварваліся на тэрыторыю Літвы і спрабавалі захапіць адну з памежных застаў, а таксама камісарыят паліцыі Салечнікаў. Пасьля таго, як ворага заўважылі, на памежным участку зьнікла сувязь. У выніку вучэньняў 30 «зялёных чалавечкаў» захапілі камісарыят паліцыі, «забіўшы» 10 паліцыянтаў.

Паводле Місюнаса, вучэньні былі не паказальныя — не было «ні дыму, ні стральбы», а вораг перасоўваўся «хутка і ціха». Пра вучэньні паведамілі толькі кіраўніцтву паліцыі, службе аховы мяжы і службе грамадзкай бясьпекі, а шараговыя паліцыянты, звычайныя жыхары краіны і апэратары Адзінага цэнтру дапамогі пра вучэньні ня ведалі. Пра тое, ці тэлефанавалі мясцовыя жыхары на экстраны нумар 112, паступаюць супярэчлівыя зьвесткі.

Вучэньні яшчэ трываюць, іх вынікі пакуль не падводзіліся.

Ваша меркаваньне

Паказаць камэнтары

XS
SM
MD
LG