Лінкі ўнівэрсальнага доступу

Суд у Гомлі аштрафаваў журналістку Ларысу Шчыракову


Ларыса Шчыракова

Працэс адбыўся ў Гомельскім раённым судзе, які разглядаў 4 адміністрацыйныя пратаколы ў дачыненьні да журналісткі-фрылансэркі Ларысы Шчыраковай: два зь іх датычацца незаконнага вырабу прадукцыі для замежных СМІ без акрэдытацыі ў беларускім МЗС, яшчэ два — за няяўку ў міліцыю.

На пытаньне судзьдзі, ці ёсьць у яе акрэдытацыя, Шчыракова адказала:

«У нашай краіне ўлады акрэдытацыю зрабілі дазволам на працу. Эўрапейская практыка разглядае акрэдытацыю як паведамленьне пра тое, што журналіст будзе здымаць рэпартажы там і там. Наколькі я ведаю, тэлеканал „Белсат“ пяць разоў падаваў заяўку ў МЗС на акрэдытацыю, але безвынікова. У сваёй краіне я жыву па правілах, якія мне гарантуе Канстытуцыя, міжнародныя пагадненьні, падпісаныя Беларусьсю. У прыватнасьці, Міжнародным пактам аб палітычных і грамадзянскіх правах таксама гарантуецца права на збор і распаўсюд інфармацыі. І ў той жа час уведзенымі падзаконнымі дакумэнтамі Беларусь парушае гэтыя мае правы».

Судзьдзя Застаўнецкая, не выходзячы ў дарадчы пакой, абвясьціла: штраф — 41 базавая велічыня (гэта 943 рублі). Прысутныя ў залі рашэньне судзьдзі сустрэлі воклічамі: «Ганьба!».

Суд у рэжыме онлайн блогеры трансьлявалі ў інтэрнэт. І як толькі Ларыса Шчыракова выйшла з будынку Гомельскага раённага суду ў двор, да яе падышла прадпрымальніца, працягнула 100 рублёў:

«Гэта на штраф. І дзякуй вам за вашу грамадзянскую пазыцыю!»

Ларыса Шчыракова (справа) пасьля суду

Ларыса Шчыракова (справа) пасьля суду

«Судзяць мяне за стрым мітынгу, які зладзілі 25 сакавіка, на Дзень Волі, удзельнікі „Маршу недармаедаў-2“ каля Палаца таварыства глухіх. Стрым трансьляваў спадарожнікавы тэлеканал „Белсат“. Яшчэ адзін матэрыял, паказаны на „Белсаце“, называўся „Беларускія лякарні ставяць досьледы над пацыентамі“. У ім расказвалася, як пацыентка Ўлукаўскай участковай бальніцы засталася без своечасовай мэдычнай дапамогі і атрымала інсульт, а іншыя, малалетнія, пакутавалі ад зробленых тут прышчэпак. Мне прыпісваюць, што я злоўжываю правамі і абавязкамі замежнага журналіста, прадугледжанымі пунктамі 2, 4, 6 артыкулу 34 закону „Аб СМІ“. Спачатку мяне запісалі ў замежныя журналісты, а пасьля пералічваюць, што я парушыла», — кажа Ларыса Шчыракова.

Журналісты, якія прысутнічалі на працэсе над Шчыраковай

Журналісты, якія прысутнічалі на працэсе над Шчыраковай

Што да няяўкі ў Гомельскі РАУС, то журналістка патлумачыла, што выклікалі яе ў міліцыю ў выходны дзень, 25 сакавіка, калі грамадзяне маюць права на законны адпачынак. Другі пратакол быў складзены за спазьненьне ў міліцыю, і таксама ў выходны, 26 сакавіка.

Апроч таго, 25 сакавіка міліцыя пад прымусам адвезла Шчыракову ў гарадзкую пракуратуру, дзе ёй уручылі афіцыйнае папярэджаньне за супрацоўніцтва без акрэдытацыі з тэлеканалам «Белсат», падпісанае намесьніцай пракурора Ірынай Макарэвіч.

Перад гэтым журналістку-фрылансэрку судзілі за ўдзел 12 сакавіка ў мірным сходзе «недармаедаў» у Рагачове. Старшыня суду Гомельскага раёну Раіса Кавалевіч аштрафавала Шчыракову на 7 базавых велічыняў, што адпавядае 161 рублю. У папярэднія гады сума штрафаў незалежнай журналістцы за нібыта незаконны выраб прадукцыі СМІ перавысіла ў эквіваленце тысячу даляраў.

13 красавіка, Ларысу Шчыракову выклікаюць у Рэчыцкі раённы суд, дзе будзе разглядацца адміністрацыйны пратакол таксама паводле часткі 2, артыкула 22.9 КаАП — за сюжэт «Дом „на курыных лапках“ у Рэчыцы. Гэта форменнае сьвінства». Склаў пратакол супрацоўнік Рэчыцкага РАУСу Сяргей Жураў. Журналістку чарговым разам абвінавацілі, што, ня маючы акрэдытацыі, яна брала інтэрвію ў жыхароў дому на вуліцы Войкава і «тым самым удзельнічала ў падрыхтоўцы і распаўсюдзе прадукцыі СМІ, разьмясьціўшы ў разьдзеле «Абʼектыў» замежнага спадарожнікавага тэлеканалу «Белсат».

Ваша меркаваньне

Паказаць камэнтары

XS
SM
MD
LG