Лінкі ўнівэрсальнага доступу

Інваліда Крывіцкага з Мазыра аштрафавалі за сход на плошчы


Рыгор Крывіцкі

Судзьдзя Мазырскага раённага суду Сяргей Алёхін 11 красавіка аштрафаваў інваліда Рыгора Крывіцкага на 20 базавых велічыняў (460 рублёў) за парушэньне парадку арганізацыі або правядзеньня масавага мерапрыемства — паводле артыкула 23.34 КаАП.

Пэнсіянэр Рыгор Крывіцкі падаваў заяўку ў райвыканкам на правядзеньне 26 сакавіка пікету гараджанаў на плошчы, каб выказаць стаўленьне да дэкрэту № 3, да пэнсійнага і выбарчага заканадаўства.

Рыгора Крывіцкага выклікалі ў райвыканкам, дзе старшыня выканкаму Алена Паўлечка і яе намесьнік па ідэалёгіі Фэлікс Галюк сказалі, што пікет на цэнтральнай плошчы не дазволены. Чыноўнікі раілі прыходзіць да іх і вырашаць пытаньні.

26 сакавіка ўлады Мазыра арганізавалі на цэнтральнай плошчы Леніна велагонкі. Аднак некалькі дзясяткаў жыхароў стыхійна выйшлі на плошчу на сход, на якім прамаўляў і Крывіцкі. Да пратэстоўцаў на плошчу выйшлі старшыня раённага савету дэпутатаў Сяргей Гвозьдзь і намесьнік старшыні райвыканкаму па ідэалёгіі Фелікс Галюк. Яны запрасілі ўдзельнікаў сходу на гутарку ў райвыканкам, але ніхто туды не пайшоў.

Пасьля сходу на прыпынку грамадзкага транспарту Рыгора Крывіцкага затрымалі людзі ў цывільным. У пастарунку, паводле спадара Рыгора, невядомы малады чалавек пагражаў зьмясьціць яго ў камэру з арыштантамі нетрадыцыйнай сэксуальнай арыентацыі, прыніжаў годнасьць, нацягваў на вочы кепку.

«За ўсе мае 73 гады яшчэ ніхто, ніколі і нідзе са мною так не паступаў. І гэта не на вуліцы, не ў падваротні, а ў міліцыі! І гэта нягледзячы на тое, што я інвалід другой групы з прычыны хваробы сэрца», — кажа пэнсіянэр Крывіцкі.

У пратаколе міліцыянты напісалі, што Крывіцкі «выкрыкваў на плошчы антыдзяржаўныя лёзунгі», парушаў грамадзкі парадак.

Маёр міліцыі Аляксандар Пагодзін у судзе сьведчыў іншае і адмовіўся ад ранейшых пісьмовых паказаньняў. Яшчэ адзін сьведка, намесьнік начальніка РАУС Аляксандар Навумік, у суд не зьявіўся.

Ваша меркаваньне

Паказаць камэнтары

XS
SM
MD
LG