Лінкі ўнівэрсальнага доступу

Прафсаюз РЭП выйшаў зь Беларускага нацыянальнага кангрэсу, але не зусім


Ілюстрацыйнае фота. Старшыня прафсаюзу РЭП Генадзь Фядыніч

Незалежны прафсаюз работнікаў радыёэлектроннай прамысловасьці абвясьціў пра выхад зь Беларускага нацыянальнага кангрэсу.

Сябрам прафсаюзу РЭП цяпер абяцаюць рэкамэндаваць далучацца да БНК як фізычным асобам — РЭП заставаўся адзінай арганізацыяй, што брала ўдзел у БНК як юрыдычная асоба, а не як шэраг фізычных.

«Мы бачым разьвіцьцё і рост папулярнасьці Беларускага нацыянальнага кангрэсу, — кажа прэс-сакратар РЭП Мікалай Герасіменка. — У 2016 годзе, далучыўшыся да БНК, мы ставілі мэту ўмацаваць гэтую структуру. Лічым, што зь ёй мы справіліся і далей заставацца ў БНК у якасьці арганізацыі ня лічым неабходным».

У заяве таксама гаворыцца, што РЭП далучаўся да БНК, каб выказаць удзячнасьць мужнасьці лідэра БНК Міколы Статкевіча, які «каля 5 гадоў паводле сфабрыкаванай уладамі справе праседзеў у турме і не пайшоў на зьдзелку з сумленьнем».

Мікола Статкевіч у інтэрвію Свабодзе заявіў, што рашэньне было ўзгодненае з БНК на Радзе кангрэсу:

«Магу сказаць, што я разумею іх сытуацыю, улічваючы, што пачалі выносіць папярэджаньні зарэгістраваным арганізацыям за ўдзел у масавых акцыях. Спадар Фядыніч (старшыня прафсаюзу РЭП Генадзь Фядыніч. — РС) застаецца старшынём сацыяльна-эканамічнай камісіі БНК».

Ваша меркаваньне

Паказаць камэнтары

XS
SM
MD
LG