Лінкі ўнівэрсальнага доступу

Прэм'ер Швэцыі: Краіна стала ахвярай тэрарыстычнага нападу

абноўлена

Паліцыя зьняпраўдзіла ранейшае паведамленьне пра затрыманьне падазраванага пасьля наезду на людзей у Стакгольме.

Паводле дадзеных паліцыі, у выніку наезду грузавіка на людзей у цэнтры Стакгольму загінулі прынамсі тры чалавекі і шмат параненых.

Швэдзкая паліцыя шукае чалавека, які быў за стырном грузавіка, і апублікавала фота з камэры назіраньня, на якім відаць мужчыну ў белым швэдры, цёмнай кофце з капюшонам і зялёнай вайсковай куртцы.

Паліцыя таксама паведаміла, што дапытвае двух чалавек у сувязі з нападам, але папярэдзіла, што яны неабавязкова зьяўляюцца падазраванымі.

Беларуска Лана Руднік апынулася побач зь месцам здарэньня. «Бачылі паніку, мноства напалоханых людзей, якія імчалі праз гандлёвы цэнтар на вуліцу,» — расказала яна карэспаднэнту Радыё Свабода.

«Крычалі ці то пра выбух ці то пра моцны ўдар. Потым маладая пара, якая была ці не на той вуліцы, распавяла, што там грузавік уехаў у людзей і там шмат целаў ляжыць на вуліцы.

Дзяўчына была ў страшным шоку і не магла гаварыць, распавядаў хлапец (не ведаю, ці сам ён бачыў, ці са словаў дзяўчыны). Адразу ж загучалі і пэрыядычна цяпер гучаць сырэны хуткай і паліцыі, у небе над цэнтрам верталёт».

Грузавік наехаў на людзей у цэнтры Стакгольму
пачакайце

No media source currently available

0:00 0:00:38 0:00

Швэдзкі бровар Spendrups паведаміў, што раней сёньня быў выкрадзены грузавік, які належыць гэтай кампаніі.

Паліцыя паведамляе, што інцыдэнт адбыўся на адной з самых ажыўленых пешаходных вуліц гораду — Дротнінгатан.

***

Хваля тэрору ў Заходняй Эўропе 2015-2017

13-14 лістапада 2015, Парыж і Сэн-Дэні (Францыя). Сэрыя скаардынаваных нападаў на працягу 35 хвілінаў адбылася ў шасьці розных месцах у Парыжы. Першая страляніна пачалася ў рэстаране і бары ў 10-ай акрузе Парыжу. Пасьля была страляніна і выбух бомбы падчас рок-канцэрту ў тэатры «Батаклян» у 11-ай акрузе. Было ўзята каля 100 закладнікаў, усяго загінула 89 чалавек. Іншыя бомбы выбухнулі ў раёне стадыёну «Стад дэ Франс» у парыскім прадмесьці Сэн-Дэні падчас футбольнага матчу Францыя – Нямеччына.

22 сакавіка 2016, Брусэль і Завэнтэм (Бэльгія). Раніцай у аўторак 22 сакавіка выбухнулі тры бомбы, начыненыя цьвікамі – дзьве на брусэльскім лётнішчы ў Завэнтэме і адна на станцыі мэтро Мальбэк. Падчас нападаў загінулі 32 чалавекі і трое нападнікаў.

14 ліпеня 2016, Ніца (Францыя). Увечары 14 ліпеня 19-тонны грузавік уехаў у натоўп людзей, якія адзначалі нацыянальнае сьвята Францыі – Дзень узяцьця Бастыліі – на Ангельскай набярэжнай у Ніцы, у выніку чаго загінула 86 чалавек.

19 сьнежня 2016, Бэрлін (Нямеччына). 12 чалавек загінула ў выніку таго, што грузавік уехаў у натоўп людзей на Калядным кірмашы ў Бэрліне. Празь некалькі дзён нападнік, які ўцёк у Італію, застрэліў італьянскага паліцыянта падчас звычайнай праверкі, пасьля чаго быў забіты паліцыянтамі.

22 сакавіка 2017, Лёндан (Вялікабрытанія). 5 людзей загінула, калі нападнік пераехаў мінакоў на мосьце Вэстмінстэр, а пасьля ўдарыў нажом паліцыянта каля будынку Парлямэнту.

Адказнасьць за ўсе гэтыя тэрарыстычныя акты ўзяла на сябе арганізацыя «Ісламская дзяржава».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG