Сэрбія ўчора выбірала прэзыдэнта. Паводле папярэдніх зьвестак ЦВК, якія перадае сэрбскае Радыё Свабодная Эўропа, перамогу з прыблізна 57% галасоў мае атрымаць Аляксандар Вучыч, які раней быў прэм’ер-міністрам краіны.
Вучыч раней заяўляў, што адзіным рашэньнем косаўскага канфлікту было бы прызнаньне незалежнасьці Косава, але Сэрбія, казаў ён, «ня мае права адракацца ад сваёй тэрыторыі». Паводле Deutche Welle, Вучыч і без прэзыдэнцкага крэсла «меў абсалютную ўладу ў краіне», у мясцовых СМІ ён прадстаўляўся толькі станоўча. Паводле выданьня, Вучыч выказваўся адначасова за далучэньне да Эўразьвязу і за супрацу з Расеяй.
Армэнія ў той жа дзень выбірала парлямэнт — Нацыянальны сход. Паводле папярэдніх вынікаў, якія перадае армянская служба Радыё Свабода, кіроўная кансэрватыўная Рэспубліканская партыя атрымала амаль 60% галасоў, сьледам ідзе блёк «Царукян» з 22% галасоў. У парлямэнт таксама праходзяць блёк «Елк» і партыя «Дашнакцуцюн». Незалежныя назіральнікі фіксавалі разнастайныя парушэньні, у тым ліку прымус да галасаваньня, раздачу або абяцаньне хабару, напад на журналіста. Шэраг парушэньняў правяраюць сьледчыя.
Гэтыя выбары — першыя пасьля канстытуцыйнай рэформы 2015 году, у адпаведнасьці зь якой Армэнія пераходзіць да парлямэнцкай формы кіраваньня. Паводле паправак да Канстытуцыі, новы армянскі парлямэнт будзе сфармаваны выключна паводле шматпартыйнай прапарцыйнай выбарчай сыстэмы.
Эквадор тым часам выбіраў прэзыдэнта. У другім туры каля 51%, паводле папярэдніх вынікаў, набраў кандыдат ад кіроўнай сацыялістычнай партыі былога віцэ-прэзыдэнта Ленін Марэна, перадае BBC. Кансэрватар Гільерма Ласа атрымаў каля 49% галасоў, ён абяцаў патрабаваць пералічваньня галасоў.
Імя Ленін палітыку даў ягоны бацька, які ідэалізаваў расейскую рэвалюцыю. Але сам Ленін Марэна ня лічыць сябе камуністам, а называе сацыялістам. Ён інвалід-калясачнік, пасьля нападу рабаўнікоў у 1998 годзе мае паралізаваныя ногі. За актыўную дзейнасьць у дапамозе людзям з абмежаванымі магчымасьцямі яго аднойчы вылучалі на Нобэлеўскую прэмію міру, з канца 2013 году ён спэцыяльны амбасадар ААН у пытаньнях інваліднасьці.
У Эквадоры чакаецца эканамічнае падзеньне (на 3% ВУП за 2017 год), бальшыня эквадорцаў чакае радыкальных эканамічных пераменаў, а дзейнага віцэ-прэзыдэнта абвінавачваюць у карупцыі — з гэтымі справамі давядзецца разьбірацца новаму прэзыдэнту. Таксама ад новага прэзыдэнта чакаюць вырашэньня лёсу стваральніка Wikileaks Джуліяна Асанджа, які ўкрываецца ў лёнданскай амбасадзе краіны ад 2012 году. Марэна казаў, што дазволіць Асанджу там застацца, Ласа ж абяцаў яго тэрмінова выдварыць.
