Лінкі ўнівэрсальнага доступу

Маці Вячаслава Касінерава: «Я вельмі ганаруся сынам»


Вячаслаў Касінераў, архіўнае фота
Вячаслаў Касінераў, архіўнае фота

Сёньня зь Вячаславам Касінеравым у СІЗА № 1 сустрэнецца адвакат. Родныя аднесьлі перадачу: не ўзялі арэхі з разынкамі і кнігі — на Валадарцы можна чытаць толькі Крымінальны кодэкс і Біблію, паведамілі ахоўнікі.

Вячаслаў Касінераў адседзеў 15 сутак за ўдзел у Маршы недармаедаў, што адбыўся ў Менску 17 лютага. Але на выхадзе з Жодзінскай турмы яму выстаўлена новае абвінавачаньне, паводле часткі 1 артыкулу 339 Крымінальнага кодэксу («хуліганства») за тое, што ён накінуў пятлю на шыю скульптуры расейскага паліцыянта, якую паставілі ў Менску каля будынка музэю МУС.

Вячаслава перавезьлі ў СІЗА № 1 на Валадарку. Раней маці дазволілі перадаць Вячаславу цёплыя рэчы і пару хвілін паразмаўляць. У сераду дазволілі перадачу і на Валадарку:

«Вонкава трымаецца ён бадзёра, але адчуваю, што яму нялёгка. Але я паважаю сына за перакананьні. Ва ўсім сьвеце фатаграфуюцца каля помнікаў і скульптур, жартуюць. Тым больш што гэта нават ня помнік, а проста арт-аб’ект.

А да Славы ў міліцыянтаў прадузятае стаўленьне. Адзін міліцыянт з Маскоўскага раёну пры затрыманьні нават рукі паціраў: „Нарэшце я на цябе надзену кайданкі і засаджу!“

Калі яго затрымалі, да мяне прыйшлі зь ператрусам ў 7.15 раніцы, знайшлі нунчакі і сувэнірны сьцізорык у падарачнай каробачцы. Канфіскавалі. „Халодная зброя“, — кажуць. Я пажартавала: дык у мяне на кухні больш сур’ёзны арсэнал — вялікія нажы для шаткаваньня.

Мяне шантажавалі: „не разьдзімайце справу, не кантактуйце з прэсай, тады мы не паведамім на вашу працу пра сына“. Але верыць нашай міліцыі — гэта сябе не паважаць. І я не пагадзілася. Я вельмі ганаруся сынам, што ён мае сваю пазыцыю і не баіцца яе выказваць.

Яшчэ ўразіла, што на „Валадарцы“ ў нас не ўзялі ў перадачы арэхі з разынкамі. І таксама кнігі — маўляў, можна толькі Крымінальны кодэкс і Біблію», — распавяла Свабодзе маці Вячаслава Касінерава Марыя.

Вячаслаў Касінераў з анархістамі з групы «Чорная ружа» 12 сакавіка правёў «дзёрзкую акцыю супраць міліцэйскага бясчынства». Каля цэнтральнага будынка Міністэрства ўнутраных спраў актывісты накінулі пятлю на шыю гарадзкой скульптуры расейскага царскага паліцыянта, якую нядаўна паставілі ў гонар 100-годзьдзя беларускай міліцыі.

За гэты пэрформанс Касінераву пагражае пазбаўленьне волі на тэрмін да трох гадоў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG