Лінкі ўнівэрсальнага доступу

Беларусь пабудавала ў Ашгабадзе «комплекс будынкаў амбасады»


Туркмэнскія дворнікі. Ілюстрацыйнае фота.

З нагоды пачатку візыту Аляксандра Лукашэнкі ў Туркмэністан на пытаньні Беларускай Свабоды адказаў дырэктар туркмэнскай службы RFE/RL Фарух Юсупаў.

Абламейка: Будаўніцтва Гарлыкскага горна-ўзбагачальнага камбінату супрваджалася канфліктнымі сытуацыямі. Што гэта былі за канфлікты?

Юсупаў: Будаўніцтва камбінату мелася быць закончанае да канца 2015 году. Як бачым, спазьненьне склала амаль паўтара году. Канфлікты сапраўды былі. Туркмэнскі бок выказваў незадавальненьне тэмпам і ходам працаў, абвінавачваў беларускі бок у зацягваньні працэсу. Вострая фаза канфлікту была летам мінулага году, калі беларускі чыноўнік Міхаіл Мясьніковіч абвінаваціў туркмэнскі бок у невыкананьні абавязаньняў па выплатах. Была і гаворка пра тое, што нават заробак беларускім будаўнікам ня плаціцца. Але гэтыя канфлікты былі палагоджаныя на ведамасным узроўні, і пасьля гэтага беларускі бок заявіў, што будаўніцтва камбінату будзе закончанае 31 сакавіка 2017 году. Але на сёньня яшчэ ня ясна, наколькі гэтае прадпрыемства гатовае да запуску.

Фарух Юсупаў

Фарух Юсупаў

Абламейка: Тым ня менш, у інфармацыйным паведамленьні пра візыт гаворыцца, што будаўніцтва закончанае.

Юсупаў: Ну там будзе, хутчэй за ўсё, нейкае ўрачыстае мерапрыемства, бо туды ж едуць абодва прэзыдэнты. Але туркмэнскія сродкі масавай інфармацыі, якія ў Туркмэністане толькі дзяржаўныя, нічога канкрэтнага ня пішуць, калі прадпрыемства будзе рэальна запушчана і калі рэальна пачнецца здабыча і перапрацоўка калійнай руды.

Абламейка: Маю ўвагу прыцягнула фраза ў беларускім інфармацыйным паведамленьні пра візыт Лукашэнкі ў Туркмэністан, што абодва кіраўнікі дзяржаваў возьмуць удзел ва ўрачыстым адкрыцьці 30 сакавіка «комплексу будынкаў» беларускай амбасады. Гэта дзіўна, бо, напрыклад, у эўрапейскіх краінах пад амбасады Беларусі занятыя даволі сьціплыя дамкі.

Юсупаў: Вядома, амбасаду ўтрымліваць — гэта ня танна. Наколькі гэта патрэбна Беларусі — я таксама ня ведаю, бо Туркмэністан, мякка кажучы, не зьяўляецца ключавой дзяржавай Цэнтральнай Азіі... Хутчэй за ўсё пабудова цэлага комплексу будынкаў зьвязана з тым, што ў Туркмэністане любяць размах, і ў Ашгабадзе ўсе пасольствы складаюцца з комплексу будынкаў. Ну і, відаць, цёплае стаўленьне да Беларусі і добрыя дачыненьні паміж абодвума прэзыдэнтамі стала асноўнай прычынай таго, што ў сталіцы Туркмэністану будзе такі комплекс будынкаў.

Абламейка: Фарух, а як бы вы мнаагул ахарактарызавалі двухбаковыя дачыненьні паміж Беларусьсю і Туркмэністанам?

Юсупаў: Дачыненьні паміж двума кіраўнікамі заўсёды былі цёплыя З кожнай нагоды Аляксандар Лукашэнка выказваў захапленьне прэзыдэнтам Туркмэністану, а Бэрдымухамэдаў заўсёды пры нагодзе выказваўся цёпла пра Аляксандра Лукашэнку. Што ж тычыцца палітычных і эканамічных дачыненьняў, то, ня лічачы вось гэтага камбінату, які каштаваў мільярд даляраў — гэта даволі ўнушальная сума, паміж такімі краінамі, як Беларусь і Туркмэністан гандлёва-эканамічныя дачыненьні знаходзяцца на невысокім узроўні. Гэта значыць, што Туркмэністан і Беларусь адно для аднаго не зьяўляюцца ключавымі партнэрамі. Туркмэністан не ўваходзіць у ЭўраЗЭС і іншыя інтэграцыйныя структуры на постсавецкай прасторы і мае статус нэўтралітэту.

Можна яшчэ згадаць, што пасьля сьмерці першага прэзыдэнта Сапармурата Ніязава ягоны самалёт быў закуплены для Аляксандра Лукашэнкі. Цяперашні прэзыдэнт Бэрдымухамэдаў не захацеў, відаць, лётаць на самалёце сэканд-хэнд.

Афіцыйны візыт адбудзецца з 29 па 31 сакавіка, паведамляе прэс-служба Аляксандра Лукашэнкі. Кіраўнік Беларусі 30 сакавіка спачатку правядзе перамовы з прэзыдэнтам Туркмэністану Гурбангулы Бэрдымухамэдавым. А пазьней яны разам прымуць удзел у цырымоніі адкрыцьця комплексу будынкаў амбасады Беларусі ў Туркмэністане. На наступны дзень Лукашэнка і Бэрдымухамэдаў наведаюць Гарлыкскі горна-ўзбагачальны камбінат, будаўніцтва якога было нядаўна завершане беларускім бокам, і дадуць старт работы заводу.

Пагадненьне аб будаўніцтве ў Туркмэністане пад ключ горна-ўзбагачальнага комплексу для вытворчасьці калійных угнаеньняў было ўхваленае ў 2009 годзе. У 2010 годзе паміж дзяржканцэрнам «Туркмэнхімія» і ААТ «Белгархімпрам» быў падпісаны кантракт на будаўніцтва пад ключ камбінату.

  • 16x9 Image

    Сяргей Абламейка

    Сяргей Абламейка нарадзіўся ў Менску. Скончыў гістарычны факультэт БДУ. Працаваў сьлесарам на МАЗе, выкладаў гісторыю ў школе, быў навуковым супрацоўнікам Музэю народнай архітэктуры і побыту, пасьля Скарынаўскага цэнтру. На «Свабодзе» – зь верасьня 1990 году, з траўня 1995 году – у Празе. Пісьменьнік, гісторык, журналіст.

Ваша меркаваньне

Паказаць камэнтары

XS
SM
MD
LG