Лінкі ўнівэрсальнага доступу

Спэцыяльны дакладчык ААН па Беларусі заклікае Лукашэнку спыніць гвалт і рэпрэсіі


Спэцдакладчык ААН па Беларусі Міклаш Харасьці

Спэцыяльны дакладчык аб сытуацыі з правамі чалавека ў Беларусі Міклаш Харасьці выказаў трывогу ў сувязі з адкрытым узнаўленьнем беларускімі ўладамі палітыкі рэпрэсіяў у дачыненьні да мірных дэманстрантаў, няўрадавых арганізацыяў, журналістаў і палітычных праціўнікаў.

Як паведамляе сайт ААН, спадар Харасьці заклікаў афіцыйны Менск спыніць гвалт і перасьлед апанэнтаў.

«Падзеі апошніх выходных даказваюць наўмысны характар рэпрэсіўных захадаў, а таксама паказваюць адкрытае вяртаньне ўлады да былой палітыкі масавых рэпрэсіяў супраць грамадзянаў, якія ажыцьцяўляюць або прасоўваюць абарону правоў чалавека, прадугледжаную Канстытуцыяй і міжнароднымі дамовамі», — падкрэсьліў дакладчык.

25-26 сакавіка выкарыстаныя жорсткія захады супраць дзясяткаў праваабаронцаў — мясцовых і міжнародных. Сотні мірных дэманстрантаў, якія пратэставалі супраць сацыяльнай палітыкі ўраду, былі атакаваныя, адвольна арыштаваныя і пазбаўленыя волі, а потым у паскораным парадку аштрафаваныя або асуджаныя да турэмнага зьняволеньня. На месцы асноўных падзеяў быў адключаны інтэрнэт, зь перабоямі працавала мабільная сувязь.

Ад сярэдзіны лютага дэманстранты пратэстуюць супраць дэкрэту, паводле якога ў дачыненьні да асобаў, што не працуюць больш за 183 дні і афіцыйна не зарэгістраваныя як беспрацоўныя, можа быць ужыты штраф.

Спадар Харасьці асабліва засмучаны нападамі на офісы НДА, у тым ліку офіс праваабарончага цэнтру «Вясна», што суправаджаліся фізычным гвалтам, а таксама зьнікненьнем на тры дні палітычнага апанэнта ўладаў Міколы Статкевіча, які ў панядзелак нарэшце вызвалены зь СІЗА КДБ.

«Два тыдні таму я, разам зь іншымі экспэртамі ў галіне правоў чалавека, папярэджваў: урад Лукашэнкі, вядомы гісторыяй гвалтоўнага перасьледу любой формы крытыкі, можа пайсьці на далейшыя парушэньні».

Міклаш Харасьці выказвае шкадаваньне, што ягоныя перасьцярогі спраўдзіліся.

Ён запэўніў, што будзе працягваць пільна сачыць за сытуацыяй і заклікаць міжнародную супольнасьць дамагацца пачатку дыялёгу з праваабаронцамі, з тымі, хто садзейнічае мірным і дэмакратычным зьменам у Беларусі.

Беларускія ўлады не пускаюць спадара Харасьці ў краіну.

Ваша меркаваньне

Паказаць камэнтары

XS
SM
MD
LG