Лінкі ўнівэрсальнага доступу

Сёмы дзень абароны ў Курапатах: малітва, сьпевы, кінапрагляд


Сёмы дзень трымае абарону намётавы лягер пад будоўляй ля мэмарыяльнага комплексу Курапаты. У нядзелю а пятай гадзіне вечару ў лягер абаронцаў Курапатаў прыехалі вернікі з эвангельскай хрысьціянскай царквы.

Яны ўсталявалі гукаўзмацняльную апаратуру і музычныя інструмэнты. Вакол імправізаванай сцэны сабраліся каля 50 чалавек.

Людзі хорам прачыталі малітву «Ойча наш», а пасьля вернікі-эвангелісты выканалі духоўныя сьпевы. — Памаліцеся і шчыра папрасіце Бога, каб ён ня даў беларусам загінуць, а даў моц супрацьстаяць ганебнай будоўлі! Выратуй нашу краіну, Божа! — заклікаў вернікаў Антоній Бокун.

Пад вечар у лягеры знаходзіліся больш за 50 абаронцаў і неабыякавых грамадзян.

— Мы ўсе чакаем ранку, гэта будзе крытычны, вырашальны момант. Калі тэхніка зноў запрацуе, мы будзе спыняць яе фізычна, — сказаў Зьміцер Дашкевіч.

Ён падкрэсьліў, што найбольш складаны час надыходзіць пад раніцу. А 8-й гадзіне ўсе сыходзяць на працу і ў лягеры застаюцца 3-4 чалавекі.

Раптам у лягер прыйшоў хлопец, відавочна, нападпітку, ён пачаў лаяцца матам і канфліктаваць з абаронцамі. Яго вывелі па-за тэрыторыю лягеру маладафронтаўцы. Там хлопец падыйшоў да двух людзей у цывільным і пагутарыў зь імі, паціснуўшы на разьвітаньне руку. Гэта стала адзіным інцындэнтам за дзень.

А сёмай прыехаў сьпявак Пятро Клюеў з апаратурай, выканаў свае песьні і пажадаў абаронцам цярпеньня і сілы для далейшага змаганьня.

На 20.00. заплянаваны прагляд дакумэнтальнага фільму «Дарога праз Курапаты». Актывісты расьцягнулі белае палатно проста на плоце і ўключылі праектар.

«Зацішша перад бурай» — усьміхаюцца абаронцы ў чаканьні раніцы. Яны рыхтуюцца да супраціву будаўнікам, у выпадку, калі працы ў Курапатах адновяцца.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG