Лінкі ўнівэрсальнага доступу

Беларусы змогуць езьдзіць бязь візы ў Аргентыну


Аргентына, Патагонія. Ілюстрацыйнае фота
Аргентына, Патагонія. Ілюстрацыйнае фота

На чарзе яшчэ шэраг краінаў — ад Аману да Філіпінаў.

У Палату прадстаўнікоў з Саўміну паступіла пагадненьне паміж урадамі Беларусі і Аргентыны аб узаемных бязьвізавых паездках грамадзян. Пра гэта Свабодзе паведамілі ў парлямэнцкай камісіі міжнародных спраў.

Дакумэнт прадугледжвае, што ўладальнікі ўсіх тыпаў беларускіх пашпартоў цягам каляндарнага году могуць знаходзіцца ў Аргентыне 90 дзён бязь візы. Каб пагадненьне пачало дзейнічаць, яго патрэбна ратыфікаваць (а гэта робіцца ў адным чытаньні) Палатай прадстаўнікоў. Дэпутаты разгледзяць гэтае пытаньне на веснавой сэсіі, якая традыцыйна пачынаецца 2 красавіка.

Адказваючы на пытаньне Свабоды аб пэрспэктывах пашырэньня бязьвізавага рэжыму, прэсавы сакратар Міністэрства замежных спраў Беларусі Дзьмітры Мірончык адзначыў:

Дзьмітры Мірончык
Дзьмітры Мірончык

«Мы вядзём перамовы аб палягчэньні візавага рэжыму з шэрагам дзяржаў. Калі пачынаць здалёк, то ў Азіі я магу згадаць Сынгапур, Малайзію, Філіпіны, Рэспубліку Карэю. Сярод лацінаамэрыканскіх краінаў у актыўнай фазе перамовы зь Уругваем, Пэру, Гандурасам. У Эўропе — Македонія, у Пэрсыдзкай затоцы — Аман. Зь усімі гэтымі краінамі мы вядзём справы да таго, каб палегчыць візавы рэжым альбо ўвесьці бязьвізавы.

Летась уступіў у сілу шэраг падобных пагадненьняў. Так, з 25 лістапада мінулага году дзейнічае пагадненьне пра бязьвізавыя паездкі ў Бразылію».

Поўны сьпіс краінаў, зь якімі ў Беларусі ўжо існуе бязьвізавае перасоўваньне, можна паглядзець на афіцыйным сайце Міністэрства замежных спраў Беларусі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG