Міністар унутраных спраў Літвы Эймуціс Місюнас заявіў выданьню Lietuvos žinios, што ў гэтым годзе зь дзяржаўнага бюджэту выдаткуюць каля 3,6 млн. эўра на будаўніцтва сьцяны на мяжы з Калінінградзкай вобласьцю.
Пра гэта паведамляе DELFI.
Па словах міністра, гэта будзе ўмацаваная сьцяна, каб не пранікалі кантрабандысты ды нелегалы. Работы павінны завяршыць сёлета. Плот пабудуюць на ўчастку 135 км — ад Віштыціса да Нёмана.
Міністар Місюнас сказаў, што шукаць новыя рашэньні для абароны мяжы з Калінінградзкай вобласьцю прымушае кепская геапалітычная сытуацыя.
Ён нагадаў пра нядаўні выпадак, калі расейскія спэцслужбы патрапілі на тэрыторыю Эстоніі і выкралі эстонскага паліцэйскага, а потым абвінавацілі яго ў незаконным перасячэньні мяжы. Таму, па словах міністра, важна спыніць падобныя інцыдэнты.
«Плот — гэта знак, што суседнюю дзяржаву мы расцэньваем як агрэсара», — падкрэсьліў Місюнас.
Прадстаўнік парлямэнцкага Камітэту па нацыянальнай бясьпецы і абароне Раса Юкнявічэне сказала, што плот мае сымбалічнае значэньне.
«Такі плот ня спыніць танкі і іншую ваенную тэхніку, але ён пакажа, што мы, у надзеі на паляпшэньне адносін з Расеяй, ацэньваем сытуацыю рэальна. Мы робім усё, каб зьнізіць пагрозы, якія прадстаўляе Расея».
Падобныя платы на мяжы з Расеяй плянуюць таксама ўсталяваць Латвія і Эстонія.
