У нядзелю, 1 студзеня, было абвешчана імя новага амбасадара Ізраілю ў Менску. На гэтай пасадзе зацьверджаны Алон Шогам — прафэсійны дыплямат, выхадзец з Латвіі, які ведае расейскую мову.
Раней Шогам працаваў кіраўніком консульскага дэпартамэнту МЗС Ізраілю. Вясной 2016 году на працягу месяца Шогам быў у Беларусі і займаў пасаду часовага паверанага ў справах Ізраілю.
У жніўні 2015 году было абвешчана пра рашэньне ўраду Ізраілю закрыць пасольства Ізраілю ў Беларусі. У сакавіку летась было прынята рашэньне захаваць прадстаўніцтва Ізраілю ў Мінску, але было невядома, у якім менавіта фармаце і складзе яно будзе працаваць.
З 26 лістапада 2015 году паміж Ізраілем і Беларусьсю дзейнічае бязьвізавы рэжым.
