27 сьнежня мітрапаліт Мінска-Магілёўскі, арцыбіскуп Тадэвуш Кандрусевіч выказаў незадаволенасьць тым, што ў апошнія гады міліцыя штучна заніжае статыстыку колькасьці беларускіх вернікаў, якія ўдзельнічаюць у калядных і велікодных набажэнствах. Свае прэтэнзіі каталіцкі герарх выказаў у адкрытым лісьце на адрас міністра ўнутраных спраў Ігара Шуневіча.
Кіраўнік Беларускага касьцёлу паведамляў, што сёлета начныя калядныя службы ў Менску наведалі каля 11 тысяч чалавек, у Горадні — каля 13 тысяч, Лідзе — каля 6 тысяч. «Гэта значыць, у трох гарадах прысутнічала 75% ад прыведзеных МУС зьвестак. А колькі было ў іншых гарадах, напрыклад Ашмянах, Ваўкавыску, Браславе, Паставах, Глыбокім, Баранавічах, Брэсьце ды іншых?» — адзначалася ў адкрытым лісьце Кандрусевіча.
На начных і дзённых калядных набажэнствах у Менску сёлета, паводле зьвестак арцыбіскупа, прысутнічалі каля 32 тысяч чалавек, у Гродне — каля 40 тысяч, у Лідзе — каля 20 тысяч. «Таму рэальная колькасьць людзей, якія ўдзельнічалі ў сьвяточных набажэнствах па ўсёй Беларусі, у шмат разоў большая, чым пададзена на сайце МУС», — заяўляў мітрапаліт.
У адказе МУС гаворыцца: «Па зьвестках Міністэрства ўнутраных спраў, у сьвяточных набажэнствах 24-25 сьнежня 2016 году на тэрыторыі Рэспублікі Беларусь прынялі ўдзел больш за 113 тысяч чалавек. Разам з тым неабходна адзначыць, што для Міністэрства ўнутраных спраў колькасьць грамадзян, якія прымаюць удзел у масавых мерапрыемствах, мае значэньне выключна з пазыцыі расстаноўкі неабходнай колькасьці сілаў і сродкаў. Наша галоўная задача — гарантаваньне грамадзкай бясьпекі».
У міністэрстве таксама паведамілі, што інфармацыя, якая разьмяшчаецца ў разьдзеле «Зводка» на сайце МУС, ня носіць афіцыйнага характару і, як правіла, патрабуе дадатковых удакладненьняў. «Ажыцьцяўляць падлік, фармаваць і паведамляць грамадзянам афіцыйную статыстыку людзей, якія наведалі набажэнства, не зьяўляецца абавязковай для МУС функцыяй. Таксама варта зьвярнуць увагу, што разьмешчаная на сайце МУС інфармацыя тычыцца выключна начных набажэнстваў у храмах у ноч з 24 на 25 сьнежня 2016 году, што ня можа расцэньвацца як агульная колькасьць вернікаў, якія прынялі ўдзел у сьвяткаваньні каталіцкага Раства», — гаворыцца ў паведамленьні.
