«Ніколі ня будзе добрай экалёгіі, калі ня будзе экалёгіі ў душы чалавека», — сьцьвердзіў на перадкаляднай прэс-канфэрэнцыі ў Менску старшыня каталіцкага эпіскапату ў Беларусі.
У парафіі ў менскім мікрараёне Зялёны Луг падрыхтоўчыя працы да будаўніцтва касьцёлу працягваліся пяць гадоў. Аднак на этапе падрыхтоўкі надзелу (які дзяржава выдзеліла ў сквэры Котаўка) да будаўнічых працаў нязгоду на ўзьвядзеньне сьвятыні выказалі прадстаўнікі «зялёных» і жыхары Сельгаспасёлку. У выніку фізычнага супрацьстаяньня «зялёных» частку дрэваў сьсячы не ўдалося.
21 сьнежня старшыня Менгарвыканкаму Андрэй Шорац заявіў, што сквэр Котаўка ў Сельгаспасёлку вырашана захаваць. Касьцёлу ж горад вылучыць іншы надзел для ўзьвядзеньня сьвятыні.
«Ня ведаем, як завершыцца гэтая справа», — адзначыў мітрапаліт на прэс-канфэрэнцыі, падкрэсьліўшы, што старшыня Менгарвыканкаму «не дае надзеі на працяг будаўніцтва» ў Котаўцы.
