Лінкі ўнівэрсальнага доступу

Ужо сёньня: Міжнародны Дзень правоў чалавека


Падзеі 10 сьнежня ў беларускай і ўсясьветнай гісторыі, а таксама афіша на сёньня.

Дата дня

10 сьнежня адзначаецца Міжнародны дзень правоў чалавека. У гэты дзень у 1948 годзе на Генэральнай Асамблеі ААН была прынятая Ўсеагульная дэклярацыя правоў чалавека.

Таксама ў гэты дзень

1520 — Марцін Лютэр публічна спаліў папскую булу пра адлучэньне яго ад царквы. З гэтага дня пачынаецца аддзяленьне пратэстантызму ад каталіцкай царквы.

1901 — былі ўручаныя першыя Нобэлеўскія прэміі.

1963 — была ўведзена ў эксплюатацыю першая чарга калійнага камбінату ў Салігорску.

1991 — цэнтральны праспэкт Менску атрымаў новую назву ў гонар Францішка Скарыны.

1991 — Вярхоўны Савет Рэспублікі Беларусь ратыфікаваў Белавескія пагадненьні аб спыненьні дзеяньня Саюзнай дамовы 1922 году і аб утварэньні СНД. Супраць прагаласаваў адзін дэпутат — былы сакратар ЦК КПБ і будучы старшыня Канстытуцыйнага Суду Валер Ціхіня.

2007 — пачаліся трансьляцыі тэлеканалу «Белсат».

2015 — Сьвятлане Алексіевіч была ўручана Нобэлеўская прэмія па літаратуры.

Прыхільнікі творчасьці Сьвятланы Алексіевіч сустракаюць яе ў міжнародным аэрапорце «Мінск», сьнежань 2015 г.
Прыхільнікі творчасьці Сьвятланы Алексіевіч сустракаюць яе ў міжнародным аэрапорце «Мінск», сьнежань 2015 г.

У гэты дзень нарадзіліся

1878 — Мікола Бліядуха, беларускі акадэмік, геоляг, дасьледчык карысных выкапняў Беларусі.

1892 — Павал Аляксюк, беларускі палітык, радны БНР, старшыня Беларускай вайсковай камісіі, кіраўнік ураду пры штабе генэрала Булак-Балаховіча.

1930 — Мікола Арочка, беларускі паэт і літаратуразнавец, аўтар гістарычных паэм «Курганьне», «Крэва», «Судны дзень Скарыны», «Каранацыя Мяндоўга».

Мікола Арочка, архіўнае фота
Мікола Арочка, архіўнае фота

У памяці

1896 — памёр Альфрэд Нобэль, швэдзкі хімік, інжынэр, вынаходнік дынаміту, заснавальнік Нобэлеўскай прэміі.

2006 — памёр Аўгуста Піначэт, чылійскі дыктатар.

Куды варта пайсьці і за чым сачыць заўтра, 10 сьнежня

На «Менск-Арэне» канцэрт украінскага гурту «Акіян Эльзы». Падчас гастроляў у Беларусі лідэр гурту Сьвятаслаў Вакарчук выконваў песьні «Песьняроў» на беларускай і расейскай мовах.

У Жэнэве пройдзе нарада вайсковых экспэртаў і дыпляматаў для ўрэгуляваньня «праблемы Ўсходняга Алепа».

Сырыйскі горад Алепа
Сырыйскі горад Алепа

Імпрэзы

Казачны вечар у музэі

Нацыянальны гістарычны музэй прапануе сваім наведнікам некалькі зімовых вечароў правесьці разам за чытаньнем чароўных казак.

Вядомыя беларускія пісьменьнікі і супрацоўнікі музэю прачытаюць свае ўлюбёныя калядныя гісторыі.

Менск, Нацыянальны гістарычны музэй Рэспублікі Беларусь (вул. К. Маркса, 12).

Пачатак у 17:00.

Квіток каштуе 1 рубель.

Экскурсіі і тэатар

Экскурсія «Гісторыі са старога падʼезду»

Аўтар ініцыятывы «Менскі шпацыр» Раман Абрамчук правядзе пешую экскурсію па пасёлку Трактарнага заводу. Пасёлак быў пабудаваны ў пасьляваенным Менску ваеннапалоннымі немцамі і вяскоўцамі-беларусамі. Экскурсавод называе Трактарны пасёлак сымбалем адноўленай сталіцы.

Менск, мэтро «Трактарны завод» (выхад у бок МТЗ).
Пачатак у 11:00.
Квіткі каштуюць 7–10 рублёў.

Спэктакль для дзяцей «Зубное шчасьце»

Калектыў творчай майстэрні «Тэрыторыя кіно» працягвае сэрыю пераднавагодніх спэктакляў для дзяцей. Грошы ад продажу квіткоў пойдуць на дабрачыннасьць, а ў фінале казкі маленькіх гледачоў чакаюць салодкія падарункі.

Менск, Loft Cafe (вул. Петруся Броўкі, 22).
Пачатак у 12:00.
Дзіцячы квіток каштуе 10 рублёў, дарослы — 5.

Мʼюзыкал-прыпавесьць «Апокрыф»

Нацыянальны акадэмічны народны аркестар імя Жыновіча прэзэнтуе мʼюзыкал да 125-годзьдзя Максіма Багдановіча. Паэтычныя творы Багдановіча ўзбагацілі нацыянальную літаратуру такімі формамі вершаскладаньня, як санэт, трыялет, танка, рубаі ды інш.

Менск, Беларуская дзяржаўная філярмонія (пр. Незалежнасьці, 50).
Пачатак у 19:00.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG