Лінкі ўнівэрсальнага доступу

ЦВК Узбэкістана заявіла пра 86-працэнтную яўку на выбарах прэзыдэнта


Ва Ўзбэкістане скончылася галасаваньне на выбарах прэзыдэнта краіны. А 20:00 гадзіне па мясцовым часе былі зачыненыя ўсе выбарчыя ўчасткі. Як паведаміла ЦВК Узбэкістана, па стане на 19:00 прагаласавала больш за 86% выбаршчыкаў (альбо больш 17 млн).

Цэнтрвыбаркам заявіў, што падчас галасаваньня не было выяўлена парушэньняў, якія б паўплывалі на вынік, у той жа час узбэцкая служба Радыё Свабода паведаміла, што парушэньні на некаторых участках усё ж зафіксавалі. Сярод такіх парушэньняў называлася агітацыя на ўчастках прадстаўнікамі палітычных партый і галасаваньне адной асобай за некалькіх іншых.

Аніводныя папярэднія выбары ва Ўзбэкістане не былі прызнаныя дэмакратычнымі і справядлівымі прадстаўнікамі АБСЭ.

Чакаецца, што пераможцам выбараў стане 59-гадовы Шаўкат Мірзіёеў, які з 2003 года быў прэмʼер-міністрам Узбэкістана, а 8 верасьня пасьля сьмерці Іслама Карымава быў абвешчаны выконваючым абавязкі прэзыдэнта. Гэта адбылося насуперак канстытуцыйнай норме, паводле якой пасаду павінен часова заняць сьпікер верхняй палаты парлямэнта. Кандыдаты-супернікі — праўладныя Хатамжон Кэтмонаў, Сарвар Атамуратаў, і Нарымон Умараў.

Цэнтральная выбарчая камісія Ўзбэкістана заявіла, што пачне абʼяўляць першыя вынікі выбараў адразу пасьля закрыцьця выбарчых участкаў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG